Daklit nga kalipay

Gipunit ni Stanly ang armas nga gipanag-iya sa lalaki. Usa kini ka Frontier nga matang sa armas nga ang bala, bala sa Armalite rifle.

“Kinsa ka? Nganong nag-apil-apil ka sa among kinabuhi? Hinigugma ko kining maong babaye ug ayaw pagpanghilabot kanamo!” pangutana nga may pakapin nga singka sa tawo ngadto kang Stanly.

“Usa ako ka police agent ug misanong lang ako sa pagpangayo’g tabang niining maong babaye nga buot mo nga lugoson,” matud ni Stanly nga miluklok na sa iyang armas ngadto sa hawak. Nag-ilis dayon sa iyang sapot ang babaye. Apan may mga gisi ang iyang sinena. “Miss, dad-on nato kining maong lalaki sa barangay hall. Asa ba dapit ang barangay hall sa Ablayan?”

Mihunong na sa paghilak ang babaye og maoy migiya sa paglakaw. Diha ra diay sa unahan ang barangay hall.

Gisugat sila sa mga tanod. Nahasiga ang mga mata sa mga tanod pagkakita nila sa babaye nga buot untang lugoson sa lalaki. Nahibaw-an ni Stanly nga anak diay kini sa usa ka konsehal sa silingang barangay.

“Pastilan, maayo gani Tess kay may nakadungog sa imong pagsinggit,” matud sa usa ka tanod.

“Ako si police agent Stanly Fuentes. Mobisita unta ko sa akong apohan, sila si Berto ug Talina apan nadunggan nako ang tawag-pakitabang niining maong babaye samtang naglakaw ko’s karsada. May kasakyan ba, dad-on nato sa police station sa lungsod kining manlulugos,” matud ni Stanly.

Gigamit nila ang multi-cab sa barangay. “Pasugoi lang unya ang mga ginikanan ni Tess ug paapasa sa lungsod,” paapas ni Stanly sa dayon nang larga sa multi-cab.

Sa lungsod, gihikay dayon ang mga dukomento pinaagi sa pamahayag ni Tess ug Stanly. Napasakaan gayud og kaso ang manlulugos nga nagpuyo sa silingang barangay Manluray.

Dili mapahimuslanon sa higayon si Stanly. Wala gani siya makig-estorya pag-ayo sa babaye nga iyang naluwas. Usa ka hapon, samtang nagpahuway si Stanly didto sa balay sa iyang apohan, miusig ang mga iro.

May mga tawo diay nga nangabut. “Uy, kamo man diay konsehal. Uy dayon kamo diri Kumare Naring,” nadungog ni Stanly ang pag-abi-abi sa iyang apohan.

“Dong, Stanly, dia sila si Konsehal, ang mga ginikanan niadtong babaye nga imong naluwas sa pagpanglugos unta. Dali usa diri Dong kay gusto sila nga makighinabi nimo,” matud ni Talina.

Migawas si Stanly gikan sa kwarto ug nakita niya si Tess uban sa iyang mga ginikanan. Daw mipilit ang panan-aw ni Stanly kang Tess.

Mitindog si Tess sa iyang gilingkoran og miduol ni Stanly. “Salamat kaayo sa imong pagluwas nako ha?” ni Tess pa nga migunit sa kamot sa ulitawo. (Sumpayan)