Anino sa Kulto

Gigamhan sa tumang kalagot, gitumong ni Carlo ang M-203 nga diha na sa iyang mga kamot ngadto kang Ramon Diaz. Gikablit niya kini apan igo na lang mipiti. Nahutdan na usab kini’g bala! Nakita niya ang supremo nga mihinay na’g lanit sa .45 kalibre nga gisuksok sa hawakan niini. Midali si Carlo sa pagpasalipod sa dakong bato.

“Mamatay ka na, Mr. Guieb,” nabati niya ang tingog sa supremo nga naglagarat sa tumang kalagot. “Patyon ko ikaw! Bang! Bang! Bang! Bang!

Daw gikitkitan sa mga bala ang bato nga gipasalipdan ni Carlo. Samtang nagpasalipod, miliraw ang mga mata ni Carlo sa palibot aron pagpangita’g sulbad sa iyang suliran. Nagkinahanglan siya’g armas. Apan wala siya’y nakitang tubag sa iyang panginahanglan. Misaog kaniya ang kabalaka. Nasayod siya nga si Ramon Diaz nag-anam na usab og paduol sa iyang nahimutangan.

Takulahaw lang, nahinumdom siya sa iyang cellphone. Nahinangop siyang nahinumdom sa maong butang. Maayo gani kay wala kini kuhaa sa mga sakop sa kulto dihang nadakpan siya nila. Dihadiha gikuha niya ang cellphone nga diha sa bolsa sa iyang diyaket. Mitikaw lang ang iyang mga tudlo nga mitulpok sa keypad niini. Gi-set niya sa type 13 ang ringtone niini ug gipislit ang asterisk-zero-zero seven aron mahimo kining cellgun. Ug nangandam siya sa iyang kaugalingon alang sa naumol niyang laraw sa paglit-ag sa kaaway.

Mihata si Carlo paggawas gikan sa iyang gipasalipdan. Gipusil gilayon siya ni Ramon Diaz. Mibalik siya pag-ipli. Kadtoy kabahin sa iyang estratehiya aron pagsuta kun unsay posisyon sa kaaway. Mihinok siya’g lipot sa pikas bahin sa bato aron pagsignit sa supremo. Apan misantop usab tingali sa supremo ang nahunahunaan niyang paagi. Wala damhang nagkasugat sila sa ilang pagpamidpid sa kilid sa dakong bato. Managsama silang nakugang. Apan si Carlo maoy daling nakahunahuna’g maayo. Kilatnon niyang gisagpo ang kamot sa supremo nga naggunit sa pistola ug gilubag kini.

Giisa niya kini aron adto makabuto sa ibabaw dungan ang pagtulpok sa send button sa cellgun nga diha sa pikas niyang kamot. Milanog ang lima ka buto. Ang supremo natusak sa mga bala nga migawas gikan sa antenna sa cellgun. Nahagba kini sa yuta ug mikirig. Ang pistola niini diha na sa kamot ni W-7. -- Sumpayan pa