Daklit nga Kalipay

Gula 1

Kusog nga siyagit sa usa ka babaye ang nadungog ni Stanley samtang siya naglakaw subay niadtong batoon nga karsada paingon sa balay sa iyang mga apohan sa barangay Ablayan, Dalaguete.

Nanglimbawot ang iyang balhibo. Alas nueve na sa gabii ug maoy misantop sa iyang hunahuna nga tingog kadto sa dili kanato nga buot lang molisang kaniya. Mikuba pag-ayo ang iyang dughan ug mipaspas sa iyang paglakaw.

Nagabhian pag-ayo si Stanley kay wala na siya’y masakyan gikan sa barangay Mantalongon, usa ka bukirang barangay sa Dalaguete. Mga pito ka kilometro ang gilay-on sa Ablayan gikan sa Mantalongon.

“Tabang! Ahhh!,” laing singgit ang nadungog ni Stanley. Sigurado siya nga tingog kadto sa usa ka babaye ang iyang nadungog. Nahukman ni Stanley nga duolon ang gigikanan sa tingog nga iyang nabati.

Inanay na siya nga nabalikan sa kaisog. Gihulbot niya ang lisensyado niyang kalibre 45 nga pistola ug hugot kini nga gigunitan samtang mainampingon nga mipaingon sa gigikanan sa tingog.

“Ayaw! Ayaw! Aghh,” laing tingog sa babaye ang iyang nadungog. Karon, natibuok ang iyang huna-huna nga dili tingog sa engkanto ang iyang nabati. Gipakusgan ni Stanley ang iyang paglakaw, apan mainampingon nga dili siya makahimo’g kasikas.

May nadungog si Stanley nga kasikas sa unahan. Bisan og gabii, apan naklaro ni Stanley nga usa ka babaye ang gigakus pag-ayo sa usa ka lalaki. Nagkaduol na si Stanley ug nakita niya nga gihukas na sa lalaki ang sapot sa babaye.

“Ayaw g’yud pagsinggit pag-usab aron dili tika patyon!” nadungog ni Stanley ang tingog sa lalaki. Karon natibuok na sa iyang huna-huna nga buot lugoson sa lalaki ang maong babaye.

Nahukas na sa lalaki ang gisul-ob nga T-shirt sa babaye. Nagpasalipod si Stanley sa punoan sa kahoy. Gusto niya nga luwason gayud ang babaye apan naghuwat pa siya sa tukmang panahon.

Nadungog ni Stanley nga naghilak ang babaye. Gihushos na sa lalaki ang karsones nga gisul-ob niini. Gisunod sa lalaki ang pagtangtang sa panti sa babaye. “Ayaw g’yud paglihok aron dili tika patyon!” nadungog ni Stanley ang laing bahad sa lalaki. Nakita ni Stanley nga mihukas na ang lalaki sa gisul-ob niini nga karsones. Kini na ang gihuwat nga higayon ni Stanley. Gikalitan niya pagduol ang tawo agi sa luyo ug gipunalan ang ulo niini sa iyang kalibre 45 nga pistola. Nalup-og ang tawo ug gitionan ni Stanley sa iyang pistola.

“Ayaw gayud pagpakita’g dautang lihok aron dili ko ikaw pusilon.” Abtik nga gikuha ni Stanley ang posas nga gitangkil sa iyang luyo ug giposasan ang lalaki. (Sumpayan)