Anino sa kulto

Gula 215

Taliwala sa sinukliay sa mga bala gipangita ni Carlo si Ramon Diaz, ang supremo sa kulto. Kaganina ra siyang wala makakita niini. Wala siya makaalinggat kun diin kini mopaingon kaganina sa pag-ulbo sa pinusilay gumikan sa kakalit sa hitabo. Dili siya makatugot nga makaikyas kini. Kinahanglang madakpan si Ramon Diaz aron pabayron sa nahimo niining mga kasal-anan ilabi na gayod sa pagpatay niini sa iyang mga ginikanan.

Nagpadayon ang makabungol nga pinusilay. Maayong pagkapuwesto ang mga tinugyanan sa balaod. Ang kahayag sa buwan ug sa mga sulo nakatabang sa mga polis sa sayon nga pagluthang sa mga Tambayawan. Sa matag karon ug unya duhawitan ang mga butobuto sa makalilisang tig-ik sa kamatayon. May mga inagulo nga nanikop og hangin nga ikadugang sa nagkapupos nga gininhawa.

Hangtod nga nagkaatubang na gayod sila si Carlo ug Ramon Diaz. Gikasugat niya kini dihang mihana siya’g sulod sa baba sa langob. Miuna kini pagpusil kaniya. Maayo gani kay nakaipli siya’g dali luyo sa usa ka dakong bato. M-203 ang gigamit sa supremo sa kulto.

Dihang milunga pagpusil ang supremo, mikalit si Carlo paggawas sa iyang gitagoan aron mobalos sa pagpabuto. Apan igo na lang mipiti ang duha ka armas nga diha sa iyang kamot. Wala nay bala! Ug nabati niya ang lanog nga katawa sa supremo sa kulto.

“Mao na kini ang imong kataposan, Mr. Guieb,” nagkanayon si Ramon Diaz.

Midali si Carlo pagbalik og pasalipod sa dakong bato. Wala na siya masayod kun unsaon niya pagpanalipod ang iyang kaugalingon. Gibuhian niya ang duha ka armas nga wala nay silbi. Si Ramon Diaz nagpadayon sa pagpabuto nga ingon sa nag-anam og kaduol sa iyang gitagoan.

Nangandam si Carlo. Gipaod niya’g maayo ang iyang bukobuko sa gipasalipdan nga bato. Nanukad siya’g maayo. Dihang nahatungod na kaniya ang supremo, kalit niyang gigunitan ang tumoy sa armas niini ug gibunlot. Nakalitan ang supremo. Wala kini makalihay dihang iyang gibuhian ang makusog nga kinumo nga didto motugpa sa apapangig niini. Milipadsay ang supremo ug nabuhian ang M-203. -- Sumpayan pa