Si Hesus ug ang duha ka tulisan

Nagdasok ang mga tawo sa sulod sa palasyo ug ang kainit sa palibot wala makapakgang sa ilang gibating kaikag nga masayod sa silot nga ipakanaug sa hari ngadto kang Hesus nga gihusay niadtong adlawa sa atubangan sa katawhan uban sa duha ka mga banggiitang tulisan.

Gianinaw ni Hesus ang palibot ug iyang nakita ang kamaya sa panagway sa mga tawo nga nagsud-ong kaniya nga dinakpan ug gikatakda na nga hukman sa silot nga kamatayon.

Migawas na ang hari ug miatubang sa bagang duot nga katawhan nga misaksi sa adlaw sa paghukom kang Hesus uban sa duha ka tulisan nga mga dinakpan sa mga sundalo.

“Palihog gamay lang nga kahilom!” bukas nga pamahayag sa hari pa nga mitan-aw ngadto sa mga tawo. “Ania kining tulo ka mga dinakpan akong hukman sa silot nga kamatayon.

“Nakaila ba kamo niining tawo nga ania sa taliwala?”

“Nakaila mi,” sa mga tawo pa nga misinggit sa pagtubag sa pangutana sa hari. “Siya si Hesus nga anak ni Maria ug Jose,” Si Hesus nga nagpasiatab nga hari sa kalibutan.”

Ug labaw pa kamong nakaila niining laing duha ka   mga tawo.” Mipadayon ang hari sa iyang pangutana.

“Sila si Estas ug Dimas,” sa mga tawo pa nga mitubag sa dugang pangutana sa hari ngadto kanila. “Mga tulisan ug kawatan sila!”

“Nan,” mipadayon ang hari. “Kun kamo pa ang ania sa akong dapit unsay makatarunganong silot nga angay ipahamtang kanila.?”

“Ilansang sa krus!” sa       mga tawo pa. “ilansang sa krus!”

“Makataronganon lamang nga silotan sa kamatayon kining duha ka tulisan,” sa hari pa. “Apan kining sinumbong nga si Hesus wala ako makakita og sala niining tawhana nga maoy akong pagabasehan sa pagsilot usab kaniya og kamatayon.

“Ilansang si Hesus sa Krus!” kusganong singgit sa mga tawo. “Ilansang si Hesus!” Ilansang sa Krus!”

Gianinaw sa hari ang palibot sa palasyo. Ug nakita niya nga nagkahiusa kini sa pagpalansang kang Hesus sa krus.

Gitawag sa hari iyang pangabaga ug nangayo og planggana nga gisudlan og tubig. Gituslob sa hari iyang mga kamot alang sa pagpanghunaw niini.

“Gihunawan ko ang akong mga kamot sa tubig,” dugang pamahayag sa hari ngadto sa mga tawo. “Pagpaila nga dili gikan kanako ang pagpalansang kang Hesus sa krus kun dili gikan kaninyo nga mga tawo.”

Gikan sa palasyo gidala si Hesus uban sa duha ka tulisan didto sa bukid sa kalbaryo ug gilansang sa krus.

“Kun tinuod kang hari,” mabiaybiayong pamahayag ni Dimas ngadto kang Hesus. “Luwasa imong kaugalingon ug luwason mo usab kami.”

“Ayaw pagsulti niana,” ni Estas pa nga mipakgang sa gipamulong ni Dimas kang Hesus. “Dili ka angay mosulti niana ngadto kang Hesus.” Makatarunganon lamang kitang silotan tugbang sa atong nahimong kasaypanan. “Apan siya walay sala ug dili makiangayon nga hukman sama sa gihukom ngari kanato.”

Gitan-aw ni Estas si Hesus nga nagpatulo sa iyang mga luha ug namulong.

“Ginoo ,” ni Estas pa. “Hinumdomi ako kun atua ka na sa imong gingharian.”

“Karon dayon.” Ni Hesus pa nga milingi sa nahimutangan ni Estas. “Mahiuban ka kanako sa akong gingharian.!” (Katapusan)