Kamatayon sa Panumpa

Gula 36

“Di-dili! Dili...!”

Ug wala kapugngi ni Xenia ang iyang mga luha. Hapit na siya mag-hysteria tungod sa gibati niyang kasakit ug kaguol sa kamatayon ni Nanay Lourdes niya. Wala ra gyud kini kadapati sa tambal nga iyang gibuhisan sa iyang unod ug kadungganan sa iyang pagka-babaye.

Gikuyogan si Xenia ni Florence ngadto sa morgue sa hospital diin didto gipahimutang ang patay’ng lawas sa iyang inahan. Mibakho siya taman sa ginhawa dihang nakita na niya ang wala nay kinabuhi niyang inahan.

Mitumaw ang laing suliran dihang gusto na ni Xenia nga igawas sa ospital ang patay’ng lawas sa iyang inahan. Dili mosugot ang taga ospital nga igawas ang patay’ng lawas sa iyang inahan tungod kay may dako pa man siyang balayranan sa pagpahigayon sa operasyon niini.

Maayo gani kay dihay taga media nga nakasugyot kang Xenia sa angay niyang buhaton. Mao nga pagkaugma sa buntag, sayo siyang miadto sa buhatan sa PAO. Wala magmakuli ang abogado sa PAO pagtabang kaniya. Kay ubos sa Republic Act 9439 kon hospital detention law, gidili man ang pagtanggong sa usa ka pasyente sa hospital sa katarongan nga wala kini ikabayad. Kini gibasehan sa abogado sa pagtabang kang Xenia. -- Sumpayan pa