Pasyon

Nangalisngaw ang kalagiting sa kaudtohon, atol ning pagsaulog sa Adlaw sa Biyernes Santo. Sama sa pundok sa hulmigas, diin naganayan ang katawhan, ning balangay sa Pitalo, atol ning pagsaksi sa usa ka Pasyon.

"Ma Digna, nganong luhaan man kanang imong duha ka mata?" kalit siya gisukot sa iyang anak nga nagpanuigon pa lang og napulo ka tuig.

"Wa kini kaso anak ... duna lang akoy nahinumdoman!" daling tubag ni Digna.

Ang tinuod ... nahinumdom lang siya ni Nisyo, nga may napulo na ka tuig karon nga milabay. Udtong tutok gihapon kadto. May gipahigayon nga Pasyon diin nahitabo kadto nga angay unta nga dili mahitabo kaniya. Naabtan silang duha si Miyoy nga nagtinagayay sa saro sa himaya, taliwala sa kinawatkawat nga kalipay.

"Mgaaaa maluibonnnn .... nganonggggg gibuhattttt mannnn kiniiii ninyongggggg duhaaaaa Dignaaaa ugggg Miyoyyyy?" nagpaminti si Nisyo niadtong higayona. Gilanit niya ang iyang sanggot ug dayon iyang giluglog ang liog ni Miyoy, hangtud kini natuay. "Diliii mooo akoooo mabasul Nisyoooo .... saaaa nabuhatttt ngaaaa salawayonnn namongggg duhaaa niii Miyoyyy!" nagkanguhal ang iyang sinultihan.

"Kay ang baho sa tungog nga natina sa imong kamisin ... daw sama usab sa imong baho samtang ikaw manawat sa imong sanggotan!"

Ulahi na ang tanan gisaysay nga hinungdan niadtong higayona ni Digna. Gumikan sa salang pagpatay ni Nisyo kang Miyoy, nabilanggo kini sulod sa napulo ka tuig. "Maaaa ... kinsaaaa mannnn kanangggg tawhanaaaa nga bungotonnnn kaayo ngaaa nagpas-an saaa sa krussss?" kalit lang nahagtos ang kahalawom sa paghanduraw ni Digna sa sangpit sa iyang anak.

Gisuling niya sa sinugdan. Wa gayod siya masayop kay sa iyang pagtan-aw si Nisyo diay ang nagkadusingot og pas-an sa krus, atol ning gihimo nga Pasyon.

"Banggggg .... banggggg!" lanog kaayo ang buto gikan sa kapolisan sa kuwerpo sa lungsod sa San Fernando.

"Gipasayloooo ... koooo naaa ikawwww Dignaaaa!" inanay gipiyong ni Nisyo ang duha niya ka mata nga mianam na sa pagtuay.

Inanay nagbuwagbuwag ang duot sa katawhan ug mibanos ang nagbuy-od nga kahilom. (Kataposan)