Love at first sight

Paspas kaayo ang recovery ni Daylen. Daw miabag sa pagpaalim sa sakit sa iyang tiyan ang kalipay nga iyang natagamtaman uban sa pagpangga ni Lowel. Gimingawan kaayo si Lowel kay sila na lang ang mahabilin sa kwarto sa ospital karong mogawas na si Daylen.

Gihatud ni Lowel si Daylen didto sa silong sa ospital. “Hatagi diay ko og numero sa imong cellphone Len kay basin og makalimot ka na nako,” daw may kasubo ang tingog ni Lowel.

“Dili g’yud kana mahitabo Wel, mobisita ko dinhi pagbalik,” pasalig ni Daylen sa iyang hinigugma. Nakapahiyom ang inahan ni Daylen nga nagtan-aw kanila nga nagsultihanay.

Mibalik si Lowel sa taas sa ospital dihang nakabiya na ang taksi nga gisakyan sa inahan ug anak. Nahinloan na sa mga room attendants ang katre nga gihigdaan ni Daylen.

Didto mihigda si Lowel sa gihigdaan ni Daylen. Iyang gihanduraw ang hamubo ra nga higayon sa ilang panag-uban apan naangkon niya ang gugma sa dalaga. Duha ka adlaw ang milabay, gibalik na usab sa operating room ang inahan ni Lowel.

Didto ra si Lowel nagpalabay sa oras sa kwarto sa ospital. Mingaw kaayo siya kay wala na may mga nurse nga mosulod kay wala may pasyente nga ilang atimanon.

Mga alas singko sa hapon, nakamata si Lowel sa iyang pagkatulog kay nakadungog siya’g tuktok sa pultahan. Taud-taud, mibukas ang pultahan ug iyang nakita si Daylen.

Daw tugob kaayo sa kalipay ang kasing-kasing ni Lowel nga nakakita pag-usab sa dalaga. Tam-is kaayo ang iyang pahiyom nga nakakita sa matahom kaayo nga panagway.

Gisugat niya’g tam-is kaayong hawok ang hinigugma. “Nganong sige ka man og tutok nako Wel?” nagpahiyom si Daylen nga nangutana sa ulitawo. “Nabag-ohan ko Len, misamot g’yud ang imong katahom human sa pipila ka adlaw nga wala ko ikaw makita,” ni Lowel pa nga miagbay dayon ni Daylen samtang sila nagtupad paglingkod.

“Ikaw no, maayo ka g’yud nga mobulatik uy, Estoryahe!” matud ni Daylen nga misandig sa dughan sa ulitawo.

Gipahigda ni Lowel si Daylen ug gipaunlan sa iyang duha ka paa samtang siya naglingkod. Dayon, giukoban ni Lowel ang mga ngabil sa dalaga. Nag-ukobay sila kay misukol man si Daylen sa kinawat-kawat nga romansa.

“Maabtan gani ta sa mga nurse dinhi Wel,” may sagol kabalaka ang tuno sa tingog ni Daylen.

“Wala na g’yuy nurse nga misulod dinhi Len kay tua man si Mama sa operating room,” dali nga tubag ni Lowel.

Giukoban pag-usab ni Lowel ang mga ngabil sa dalaga. “Len, ako usa nga sirhan ang pultahan sa kwarto,” nagdali si Lowel nga mitindog ug mi-lock sa pultahan. (Sumpayan)