Love at First Sight

Gula 2

Pipila ka gutlo human makabiya ang inahan ni Daylen gikan sa kwarto sa ospital aron mopauli usa sa ilang balay, mihari ang kamingaw sa lawak.

Nahukman ni Lowel nga suoron niya si Daylen pinaagi sa pakighinabi niini sanglit iyang nabatyagan nga sa hilom may pagtan-aw siya sa dalaga tungod sa talagsaong kaanyag niini nga nahuptan.

Kalit misantop sa huna-huna ni Lowel nga gamiton niya ang comedy style aron masuod niya si Daylen. Tuod man, misugod na pag-arangkada si Lowel.

Sa iyang pakigsulti sa dalaga, sukipan g’yud niya kini og komedya mao nga makakatawa g’yud si Daylen. Tungod niini, inanay nga nahanaw ang pagka hilomon ni Daylen ngadto sa ulitawo.

Nagsuginlanay sila sa ilang mga kaagi. Gisuwayan ni Lowel ang pagpangutana sa dalaga kabahin sa iyang lovelife. Wala magduha-duha pagtug-an si Daylen nga daghan ang buot manguyab kaniya apan wala niya tagda.

“Maayo ang imong gibuhat Len kay kun gitagad pa nimo sila, karon may uyab ka na unta ug wala na ko’y chance,” nagpahiyom si Lowel nga misulti niini nga may sagol komedya.

Mihana pagbangon si Daylen. “Adto usa ko sa CR ha,” matud sa dalaga, kinsa naglisud pagkab-ot sa dextrose nga gikab-it sa metal stand. Si Lowel ang mikuha sa dextrose ug mialalay ni Daylen paingon sa CR.

“Bi, ako na lay bitbit sa dextrose. Dinhi ka lang gawas sa CR, Lowel,” giingnan ni Daylen ang ulitawo. “Ako na lang unta’y bitbit sa dextrose paingon sa sulod sa CR Len,” ni Lowel pa.

“Saba diha uy, kalain, lalaki ka gud,” tubag ni Daylen.

Gihuwat ra ni Lowel si Daylen sa gawas sa CR. Dihang migawas na si Daylen, gikuha niya ang plastic bag sa dextrose ug siya ang mibitbit nga pinataas paingon sa katre sa dalaga.

Una nga gikab-it ni Lowel ang dextrose sa metal stand ug dayon gitabangan niya ang dalaga nga makahigda sa katre. Iya pa nga gihabolan ang dalaga ug dayon milingkod siya sa silya tupad sa katre.

Gilingi ni Lowel ang iyang inahan, wala pa gihapon kini mahigmata sa pagkatulog.

Nagpadayon nga nagsultihanay sila si Daylen ug Lowel. Sa laktud, bisan sa kabag-o pa sa ilang panagkita, apan nasuod na kaayo ni Lowel ang dalaga.

Taud-taud, mitingog ang message alert sa cellphone ni Daylen. Gibasa niini ang message.

“Hala… dili makabalik si Mama karon kay gihilantan pag-ayo ang akong manghod,” daw may kasubo ang tingog sa dalaga. “Walay problema Len, total dia man ko, ako na lang ang mobantay nimo,” matud ni Lowel. (Sumpayan)