Anino sa kulto

GULA 208

Nakaamgo si Carlo nga kinahanglang molihok na siya. Apan nahisagmuyo siya nga nakaamgo sa iyang kahimtang. Ginapos siya. Nabihag siya sa mga alagad sa Satanismo. Wala pa siya masayod kun hangtod kanus-a nga magpabilin siya sa maong kahimtang.

Si Belen ingon sa nawad-an nag paglaom nga makalingkawas pa sila sa ilang kahimtang. Sila si Jimmy ug Tiyo Berto ingon usab sa nahugno. Apan lahi si Carlo. Iyang gipakigbatokan ang negatibong panghunahuna nga buot mogahom kaniya. Samtang si Padre Daniel miawhag kanila nga maghiusa sa pag-ampo sa Dios. Matud sa pari, dili makatugot ang Dios nga modaog ang daotan batok sa katarong.

“Wala ako magdahom, Padre Daniel,” ni Carlo pa, “nga ingon niini ka daotan ang hepe sa kapolisan sa Mabini. Usa siya ka impostor.”

“Gigamit lang sa yawa si Ramon Diaz, Mr. Guieb,” sa pari.

“Unsay buot mong ipasabot, Padre?” nakasuna si Carlo.

“Malalangon ang yawa,” mipasabot ang pari. “Daghan siya’g paagi aron matental ang tawo. Gani iya mang gisulayan pagtental ang atong Ginoo didto sa kamingawan apan wala siya molampos. Si Satanas daghan kaayo’g takoban aron malingla ang tawo. Usahay himuon niyang anghel sa kahayag ang iyang kaugalingon aron ang tawo motuo nga dili siya daotan. Apan kun hugot ang atong pagsalig sa Dios, si Satanas dili makasulod sa atong kinabuhi.”

“Unsa ba gyud katinuod ang doktrina sa Satanismo, Padre?” ni Carlo nga ang tingog mibandabanda sulod sa langob. “Tinuod ba nga matawo pag-usab si Maria dinhi sa kalibotan aron manginahan pag-usab sa Nazareno?”

“Usa lang kana ka salimuang sa mga Anti-Kristo,” matud sa pari. “Ang Simbahang Katoliko wala magtuo nga magpakatawo pag-usab si Maria ingon man si Jesus.”

“Apan nganong aduna may mga tinuohan nga sama sa Tambayawan?” ni Carlo.

“Gitagna na kanang daan sa Kasulatan,” tubag ni Padre Daniel. “Nahisulat na sa Bibliya nga mokaylap ang kadaotan sa kalibotan ug motungha ang daghang mga anti-kristo aron pagpasalaag sa katawhan sa Dios.”-- Sumpayan pa