Kamatayon sa Panumpa

Gula 29

Paghisulod nila sa mabugnaw’ng lawak, gilayog dayon si Xenia ni Gordon. Ingon sa naghinamhinam na ang polis nga maangkon sa hingpit ang iyang pagka-babaye. Apan gisanta siya ni Xenia.

“Ayaw ko pugngi,” hagawhaw ang tingog ni Gordon. “nagkasabot na baya ta bahin ini.”

“Tinuod kana,” ni Xenia pa. “Pero gusto lang kong maneguro. Maldito ra ba mong mga polis.”

“U-unsay buot mong ipasabot?”

“Bayad una sa di ka pa mosakay sa akong lawas.”

Wala motutol si Gordon. Dihadiha gitunol niini kaniya ang lima ka tibuok tag P1,000 nga papel. Gihipos dayon ni Xenia ang kuwarta.

Gipahigda dayon si Xenia ni Gordon sa ibabaw sa humok nga kama. Gitagsa-tagsa niini’g tangtang ang tanang mga salimbong sa iyang lawas. Wala siya motutol sa gibuhat sa lalaki. Unsa pa bay iyang mahimo nga gibayran na man siya niini?

Dihang misugod nag halok si Gordon sa iyang ngabil, gibati ni Xenia ang tumang kaluod. Kasukaon siya! Apan gipaningkamotan niya ang paglig-on sa iyang ginhawaan. Gipasagdan niya si Gordon nga misugod nag pahimulos sa iyang lawas. -- Sumpayan pa