Anino sa kulto

Gula 207

“Kinahanglang praktikal kita karong panahona, Mr. Guieb. Nakita namo nga walay kapuslanan ang pagsimba sa giila ninyong Dios tungod kay sukad pa kaniadto ug hangtod karon nagpabiling nagkalisodlisod ang Iyang katawhan. Si Satanas maoy matuod nga ginoo. Dili niya pasagdan nga magkalisodlisod ang katawhan. Andam siyang mohatag sa tanan nga makalipay sa iyang mga alagad sa bisan unsang paagi, sa minaayo man o sa dinaotan.”

Nahatiurok si Carlo. Natugkad niya sa sinultihan ni Ramon Diaz nga ang utok ug balatian niini gilamayan na gayod pag-ayo sa kamandag ni Satanas. Nasuta niya karon nga si Ramon Diaz wala nay ilhong katarongan. Daotan na ang nagmando sa hunahuna niini nga gisudlan sa espiritu sa demonyo. Mentally unbalanced ug nabutaan sa kangitngit ang kaisipan niini.

May kahiamgo nga nanuslok sa hunahuna ni Carlo. Nasuta niya nga dili na pamation ni Ramon Diaz ang maayo niyang mga panahom. Natugkad niya nga ang maong tawo hingpit nang nagtuo nga kini ang anaa sa katarongan. Buhaton gayod niini ang bisan unsa nga gusto niining buhaton tungod kay hingpit na kining naulipon sa yawa.

“Andama na ang imong kaugalingon, Mr. Guieb,” namulong si Ramon Diaz tapos sa pipila ka gutling nga giharian sa kahilom. “Hapit na moabot ang adlaw nga maghari na ang ginoo sa mga Tambayawan. Gusto ko nga makasaksi ka sa maong adlaw sa dili ko pa ikaw hukman sa kamatayon.”

Nahitalunong si Carlo Guieb. Taudtaod nang nakalakaw si Ramon Diaz uban sa mga disipulo niini apan nagpabilin siyang nahiunlod sa halawom nga pagpalandong. Natugkad niya nga maayo na gyud ang pagkayabag sa hunahuna ni Ramon. Naimpluwensiya gayod kini pag-ayo sa doktrina sa Satanismo.

Natugkad na ni Carlo ang lintunganay nga tumong sa Tambayawan Black Brotherhood. Gihimo nilang gabayan ang itom nga gahom sa espirituwalismo sa materyalistiko nilang tinguha. Ang kahakog sa gahom ug bahandi maoy nakaingon nga nabitik sila sa kaugalingon nilang lit-ag. Gibutaan sila sa sayop nilang pagtuo. Kinahanglang may makaluwas kanila gikan sa impluwensiya sa daotan. Kinahanglang may makasanta sa Tambayawan sa daotan niining mga laraw. -- Sumpayan pa