Ikaduhang Hudas

Daw gikumot ang dughan ni Martillano nga nagsud-ong sa haya sa 14 anyos niyang anak nga gi-gang rape ug gipatay sa lima ka mga batan-ong lalaki nga mga adik-adik sa ilang dapit.

Buot unta siyang mohilak alang sa pagpahungaw sa kaguol nga iyang gibati apan walay luha nga moagas sa iyang mga mata ug igo na lamang siya sa pagpukpok sa iyang dughan alang sa pagpaluag sa naghuot niyang gininhawa.

Wala magtuo si Martillano nga masinati kini sa iyang anak tungod kay gipakita man niya ang tanan niyang kaayo ngadto sa iyang mga silingan gikan sa mga tigulang hangtod na sa mga batan-on sa ilang dapit. 

Giila si Martillano nga matinabangon sa ilang dapit nga maoy hinungdan nga niining kagul-anan nga nasinati sa ilang pamilya daghan usab sa ilang mga silingan ang mipakita og simpatiya.

“Way ibawos mga bataa,” nagyawyaw si Iya Marta nga nagtan-aw sa haya sa anak ni Martillano. “Gihatagan sa tanang kaayo unya maoy gibawos sa mga salbahis nga mga adik-adik,”

“Nadakpan na ang duha ka mga suspetsado sa mga polis,” mitimang usab si Nanay Corsena. “Tua na nabalhog na sa bilanggoan ug ang laing tulo gipangita pa sa mga polis.” 

Wala makaagwanta si Martillano nga naminaw sa gipanulti sa ilang mga silingan nga misimpatiya sa kagul-anan sa ilang pamilya.

Misamot ang gibating kaguol ni Martillano nga naminaw sa gipanulti sa ilang mga silingan maoy hinungdan nga misulod kini sa lawak sa ilang panimlay.   

“Hu! hu! hu!” naghilak nga mipasunding sa iyang kaisipan si Iya Isay nga nahidangat sa panimalay usa ka adlaw niana. “Si Engko Baresto nimo Dong, tua sa hospital.”

“Ngano man,” ni Martillano pa nga masulob-on usab ang panagway nga nagtan-aw sa tigulang nilang silingan nga naghilak.”Giatake lagi kagabii sa high blood mao nga akong gidali paghatod sa tambalanan.”

“Unya, kumusta na man iyang kahimtang Iya?” nangutana si Martillano.

“Maayo na unta lagi,Dong,” nagkanayon ang tigulang nga nagpamahid sa luha sa iyang mga mata.”A-apan, hu!hu! hu!”

“Apan unsa man, Iya?” dugang pakisayod ni Martillano sa tigulang. “Unsay nahitabo nga mihilak ka na man hinuon?”

“Daku man god kaayo mi og balayranan sa tambalanan,” dugang pa ni Iya Isay. “Mao nga mangayo unta ko nimo og tabang bisan ako lang unyang data-datahan sa pagbayad.”

Nagdali sa pagsulod sa lawak si Martillano ug pipila lang kagutlo ang nakalabay mibalik kini kang Iya Isay nga nagbitbit na og sobre nga gisudlan sa maong kantidad nga gikinahanglan niini.

Gihimo lamang nga takoban ni Martillano ang gipakita niyang kaayo sa iyang mga silingan sanglit luyo sa mao niyang kaayo mao man usab ang iyang kadautan.

Pusher og shabu si Martillano ug kini ang hinungdan sa pagdagsang sa mga adik-adik sa ilang dapit. Ug gihasol ang iyang tanlag sa gidangatan sa bugtong niyang anak.

Gikuha ni Martillano ang gitagoan niyang armas ug gitapion ang sumbohan sa tuo niyang tampihak ug gisundan kini sa lanog nga boto nga miresulta sa pagtuasik sa daghang dugo. (Katapusan)