Gitutokan pag-ayo ni Xenia si Gordon. Hait ang iyang tinan-awan ngadto sa polis. Mibati siya’g kalagot ngadto niini.
“Abi ko bag kinasingkasing ang imong tuyo pagtabang,” ni Xenia pa. “Mipatigbabaw gyud ang imong pagka-oportunista. Daghang salamat na lang sa imong tanyag...”
Ug mibarog si Xenia. Wala na siya motiwas pagkaon. Gibiyaan niya ang polis sulod sa kan-anan. Gisangpit siya ni Gordon apan wala na kini niya panumbalinga. Mipaturatoy siya paglakaw.
Nahiabot siya nga wala damha sa ganghaan sa Basilica del Sto. Niño. Napahunong siya sa paglakaw. Unya nakahukom siyang mosulod. Miluhod siya atubangan sa altar. Nangaliya sa kahitas-an nga unta panultolan siya kun unsay angay niyang buhaton.
Paggawas niya sa simbahan, misantop sa iyang hunahuna nga moadto sa barangay hall sa Quiot. Namasin siya nga may ikatabang ang mga opisyal sa ilang barangay sa suliran nga iyang giatubang.
Tuod man, midangop gayod si Xenia sa mga opisyal sa ilang barangay. Wala magmakuli ang barangay paghatag og ayuda kaniya. May hospitalization program man ang ilang barangay. Apan P1,000 ra ang hinabang nga gikahatag ngadto kaniya. Dako pa kaayo’g kulang ang maong kantidad aron mapalit niya ang tanang mga resita sa doktor ni Nanay Lourdes niya. -- Sumpayan pa