Gula 24
Unya, may takulahaw lang misantop sa hunahuna ni Xenia. Si Gordon!
Ingon sa nakakita’g diyotay nga paglaom si Xenia dihang nakahunahuna siya ni Gordon, ang polis nga nangulitawo kaniya. Nakahukom siyang modangop kang Gordon. Basin pag makatabang kini sa problema nga iyang giatubang. Busa, nakahukom siyang makigkita niini.
Naglakaw lang siya paingon sa presinto sa kapolisan diin nadestino si Gordon. Sa iyang pag-abot sa presinto, miduol dayon siya sa usa ka polis. Gitug-anan niya ang maong polis nga si PO3 Racales ang iyang tuyo. Dihadiha, mibiya ang maong polis sa iyang atubangan aron pagpahibalo kang Gordon nga nangita siya niini.
Wala madugay nahiabot si Gordon. Ingon kini sa nasurpresa pagkakita kaniya. Nasabot ni Xenia nga wala gayod kini magdahom nga mahiabot siya sa presinto sa kapolisan nga gialagaran niini.
“Unsa bang hangina ang nagdala nimo dinhi?” Pangutana ni Gordon.
“May importante kong tuyo nimo,” ni Xenia pa. “Dinalian kaayo.”
Aron makasulti sila’g maayo, gidala si Xenia ni Gordon sa usa ka restaurant nga nahimutang atbang sa presinto. Mipahimutang sila sa lamesa nga layo sa ubang mga kustomer.
Ug samtang nangaon sila, gidaygan ni Xenia si Gordon mahitungod sa iyang tuyo niini. Kuwarta! -- Sumpayan pa