Anino sa kulto

Kahilom. Sila si Jimmy, Belen ug Tiyo Berto wala pud mosagbat.

“Usbon ko ang pagpangayo sa imong pasaylo, Padre,” gigisi ni Carlo ang kahilom, “tungod sa sayop kong pagtuo bahin kanimo.”

“Wala ka makasala, Mr. Guieb,” sa pari pa. “Bisan ako pay nahimutang sa imong dapit, aboton usab ako’g katahap.”

“Salamat, Padre, nga nakasabot ka.”

Naputol ang ilang panagsulti dihang may dakong kahayag nga nagpaingon sa ilang nahimutangan. Nabati nila ang hinagtok sa mga tunob nga nagkaduol. Mibulto ang unom ka anino. Mihunong kini sa ilang tungod. Pulos nagmaskara ug ala Ninja ang unom. Ang usa maoy nagbitbit sa petromaks.

Mikusog pagbutokbutok ang dughan ni Carlo samtang nagtan-aw sa unom ka tawo nga nagbarog sa iyang atubangan. Nagtuo siya nga may daotang buhaton kanila ang maong mga tawo.

Ang usa sa unom ka tawo nga nagmaskara mihinay pagduol kang Carlo. Halos pugngan sa sekreta ang iyang pagginhawa dihang nagkaatubang na sila. Nakigtinutukay kini kaniya. Unya gipikpik niini ang iyang abaga.

Inanay nga gitangtang sa tawo ang panaptong itom nga gitaptap sa nawong niini. Nagsaka-kanaog ang ubol-ubol ni Carlo samtang nagsud-ong sa gibuhat sa tawo sa iyang atubangan.

“I-ikaw...!” Nakatuaw si Carlo sa tumang kahikugang sa dihang natangtang na ang taptap sa nawong sa tawo.

Ang galamhan ni Carlo Guieb ingon sa gidangdang sa nagdilaab nga kalayo samtang nagtan-aw sa bayhon sa lalaki nga bag-o pa lang gitangtangan sa taptap ang nawong -- ang misteryoso niyang kaaway nga iyang gika-engkuwentro didto sa Luneta. Nabatyagan niya ang pagbukal sa iyang dugo ug misugwak paingon sa iyang tangkugo. Buot unta niyang hasmagan ang tawo apan ang malig-ong pisi nga gigapos sa iyang mga kamot ug tiil maoy nagpiog sa nagdilaab niyang tinguha sa pagpahamtang sa salbahis nga nagbarog sa iyang atubangan. Nagkita na gayod sila! -- Sumpayan pa