Oh, Lord!

Nag-alintabo ang kapungot nga gibati sa kahiladman ni Tony Faith Mortales kang Insek Shiyu Ngu nga usa ka negosyante ug maoy dakong pangulo sa sindikato sa illegal nga drogas sa ilang dapit.

Natibuok na ang hukom ni Tony Faith nga pagpanimalos sa maong negosyante kinsa maoy nakaingon sa iyang pagkabalhog sa bilanggoan sulod sa lima ka tuig nga gidugayon.

Gitan-aw ni Tony Faith iyang relo de pulso ug nagtug-an kini nga alas 7 na ang takna sa gabii ug pipila na lamang ka gutlo iyang paaboton nga manira na nga si Insek Shiyu Ngu sa iyang tindahan.

Mibangon si Tony Faith sa iyang gihigdaan sa sulod sa lawak sa boarding house nga iyang gipuy-an ug giablihan ang dala niining knapsak nga maoy gisudlan sa armas nga kalibre 45.

Gisusi ni Tony Faith ang magazine niini ug iyang nakita nga puno kini sa mga bala ug gibalik niya sa pagpaslak ang magazine ug wala lamang damhang naaninag sa iyang handurawan ang nahagba nga patay’ng lawas ni Insek Shiyu Ngu nga naligo sa kaugalingon niining dugo.

“Ha! ha! ha! ha!”

Wala kapugngi ni Tony Faith iyang kaugalingon sa paghakhak og katawa nga nagtan-aw sa nagbuy-od sa yuta nga patay’ng lawas ni Insek nga natusak ang kalawasan sa bala   sa iyang armas.

Nagtrabaho isip drayber ni Insek Shiyu Ngu si Tony Faith ug nasayud siya sa mga illegal nga kalihokan niini sanglit mabati man niya ang panagsulti sa mga kauban niini sa sindikato.

Hangtod usa ka higayon niana nahitabo nga gironda sa mga polis ang usa ka bodega diin gihimo ang panagtigom nila ni Insek Shiyu Ngu ug sa mga kauban niya sa sindikato.

Dali nga nakasibat si Insek Shiyu Ngu agi sa sekretong agianan ug siya nga nagpaabot sa sulod sa sakyanan maoy gidakop sa mga polis ug gibalhog sa bilanggoan.

Nagpaabot si Tony Faith nga tabangan ni Insek Shiyu Ngu nga makagawas sa bilanggoan sanglit nasayud man kini nga wala siyay labot sa maong illegal nga kalihokan.

Apan milabay na lang ang pipila ka mga bulan nga iyang pagkatanggong sa bilanggoan walay Insek Shiyu Ngu nga mitabang kaniya hangtod nga nahukmang mabilanggo sa tibuok niyang kinabuhi.

Ug didto sa bilanggoan maoy iyang nahimong kalingawan ang pagbasa sa Bibliya nga maoy nakahatag kaniya og dugang kalig-on taliwala sa mga kalisod nga iyang naangkon.

Gumikan sa gipakitang kabuotan ni Tony Faith sulod sa bilanggoan wala lamang damha nga nalakip siya sa mga binilanggo nga gihatagan og kagawasan sa pamuno nasud.

Nagdali sa pagkanaug si Tony Faith sa boarding house nga iyang gipuy-an ug mipaingon sa tindahan ni Insek Shiyu Ngu sa pagtuman sa gitinguha niyang panimalos.

Dihang mosulod na unta si Tony Faith sa tindahan ni Insek Shiyu Ngu maoy iyang nabati ang singgit sa tindira nga nangayog panabang sanglit giatake ang             maong negosyante ug namatay.

“Oh, Lord!” ni Tony Faith pa nga nakahangad sa kahitas-an. “Salamat nga wala mo itugot nga mahingpit ang akong pagkadautan!” (Katapusan)