Anino sa kulto

Gula 199

Milabay pa ang daghang mga gutlo. May mga tawo na usab nga misulod sa langob nga nagdalag plaslayt. Dihay ilang gitabangan og pugong kay buot kining molugnot. Ug sa ila ba kahang kalagot sa pagsuki niini, ila kining gitukmod. Natuwandos ang tawo diha gayod tungod sa tiilan ni Carlo.

Apan nakugang si Carlo sa nakaila na niini. Si Padre Daniel! Gibihag usab si Padre Daniel sa mga sakop sa kulto!

Sila si Belen, Jimmy ug Tiyo Berto nahigmata gumikan sa kaguliyang. Ug nahikuratan sila pagkakita kang Padre Daniel nga nahimo usab nga dinakpan sa mga Tambayawan.

Gigapos sa mga Tambayawan si Padre Daniel sa usa ka haligi nga duol sa gigaposan kang Carlo.

“Wala gayod ako masayop, Mr. Guieb,” nagkanayon si Padre Daniel, dihang nakalakaw na ang mga Tambayawan, “nga kamo kini.”

“Unsay buot mong ipasabot, Padre?” ni Carlo nga wala makaagpas sa sinultihan sa pari. Nalimot na siya nga kausa niana natahap siya nga ang pari usa ka sakop sa kulto.

“Nasayod ko nga may laing dinakpan ang mga sakop sa kulto,” sa pari pa. “Gitug-anan ko nila sa wala pa ko nila dad-a dinhi.”

“Wala ko makatugkad sa imong gipanulti, Padre,” ni Carlo.

“Paminaw, Carlo,” nagkanayon ang pari. “Niadtong Lunes sa gabii gidapit ako sa mga sakop sa kulto ug gidala sa usa ka hilit nga dapit nga tinaptapan ang mga mata. Ug kaganina, ila kong gikuha didto aron itipon dinhi kaninyo.”

“Mao diay nga nawala ka didto sa kombento kay gidagit ka man diay usab sa mga Tambayawan,” matud ni Carlo. “pero unsa may hinungdan nga ila kang giangin?”

“Nagdumot sila kanako,” matud sa pari. “Gusto silang mahanaw ako sa kalibotan tungod kay babag ako sa ilang mga laraw. Sa akong mga homilya, kanunay nakong gipasidaan sa katawhan nga magbantay sa mga Anti-Kristo. Wala makauyon ang mga Tambayawan sa akong gihimo hinungdan nga nagdumot sila kanako.” -- Sumpayan pa