Anino sa kulto

GULA 198

Nalingla ko, Tiyo,” ni Carlo pa. “Wala ko magdahom nga may mga polis na diay sa atong lungsod nga nagpasakop sa satanismo.”

“Salbahis nga Maj. Campo,” ni Jimmy pa. “Wala ako magdahom nga siya diay ang bangis nga lider sa kulto.”

“Nagtuo gyud ko nga usa ka babaye ang supremo sa Tambayawan,” matud ni Tiyo Berto, “kay tingog man sa usa ka babaye ang makigsulti kanamo nga magpaila nga siya ang supremo.”

“May modern device ang hepe, Tiyo,” nga makapausab sa iyang tingog ngadto sa tingog sa usa ka babaye. Ang iyang relo nga Omega.”

“Hain man kaha sila si Ate Arlin ug Inday Shantal, Gaw?” ni Belen sa tingog nga nagtangag og kahingawa. “Nia kaha usab sila niining maong langob?”

“Mao kanay dili ko makaseguro, Gaw,” ni Carlo pa. “Walay laing tawo nga akong namatikdan dinhi gawas lang kanato.”

“Kun mao, hain man kaha diay sila si Ate?”

“Lisod pa kanang tubagon sa pagkakaron. Ang maayo natong buhaton nga maningkamot kita nga makalingkawas niining atong pagkagapos.”

Wala gayod makalingkawas sila si Carlo, Jimmy, Belen ug Tiyo Berto sa ilang pagkagapos. Lig-on ug dagko ang pisi nga gigapos kanila. Hugot kini nga gibaat sa ilang mga kamot ug tiil. Gihimo na nila ang tanang paningkamot nga mabadbad ang pisi, apan wala gayod kini molugak bisan diyotay na lang unta. Misamot hinuon kini kahugot sa pagpunay nila’g lihok.

Namatikdan ni Carlo nga wala nay timik sila si Belen, Jimmy ug Tiyo Berto. Misantop sa iyang hunahuna nga hayan nahikatulog ang tulo gumikan sa kakapoy sa kalawasan bisan pa man sa kalisod sa ilang kahimtang nga ginapos. Sa iyang banabana, hapit na mobuntag. Apan wala siya batiag duka. Ang iyang alimpatakan nagpadayon paggaling og mga ideya nga sarang niyang kaabyan sa pagluwas sa iyang kaugalingon ug sa tulo niya ka kauban niining hagip-ot nga kahimtang sa ilang kinabuhi. -- Sumpayan pa