Kamatayon sa panumpa

Nasayran ni Xenia gikan kang Valerie nga magsige diay og padalag kuwarta si Kendall ngadto sa ilang mga ginikanan. Kanunay sab manawag si Kendall sa long distance apan wala gayod kuno kini maghisgot bahin kang Xenia.

Sa nasayran ni Xenia, nahingpit ug natibuok na gayod ang iyang pagtuo nga nahikalimot na si Kendall kaniya. Ug gitibway na niini sa pagpatay ang ilang mga panumpa.

Na-realize ni Xenia nga husto ang gipakanaog niyang desisyon nga tun-an ang iyang kaugalingon sa inanay nga paghikalimot kang Kendall. Nasuta niya karon nga wala na gyud siya’y angay laoman sa ulitawo. Misantop sa iyang hunahuna nga kinahanglang maka-move on na siya sa hingpit. Kun aduna lay tarong nga lalaki nga manguyab niya, sugton gayod niya kini aron mahikalimot na siya sa hingpit kang Kendall. Unya nakahunahuna siya ni Gordon. Nakapanglingo si Xenia. Kun sama ra’g matang ni Gordon ang lalaki nga mangulitawo kaniya, dili na lang sab siya magpahinayak sa pagpakig-relasyon. Dili kasaligan nga pagka-lalaki ang sama kang Gordon nga bisan minyo na, mohirit pa gihapon sa lain.

Ang gusto niyang ikarelasyon mao ang lalaki nga walay kabilinggan sa kinabuhi. Kanang lalaki nga matuod nga mahigugma kaniya ug makadawat sa iyang pagka-siya. Kanang lalaki nga masinaboton ug dili sama kang Kendall nga kutob ra sa “hymen” ang paghigugma kaniya. -- Sumpayan pa