Anino sa Kulto

Mikilas ang mga mata ni Carlo sa makalipong nga kangiob. Wala siya’y nasabtan sa iyang palibot. Mikipatkipat siya. Iyang gisulayan pag-anad ang iyang panan-aw sa makabuta nga kangitngit. Buot niyang sutaon kun unsa kining dapit nga iyang nahimutangan. Gumikan sa kamingaw nga mihari sa maong dapit, sama sa mabati niya ang hinagtok sa iyang kasingkasing.

Unya nakignat si Carlo. Nakabati siya’g mga kinasikas nga dili halayo kaniya. Mga hinaganas nga wala niya hisabti nga ingon sa nag-anam kaduol sa iyang nahimutangan. Unya ang hinaganas nahimo nang hinaguros sa mga pako sa nagginukdanay nga mga kuwaknit ug kabyaw. Misulay siya pagtikubo dihang ang usa kanila mipakahit sa iyang ulo sa paglupad.

Nasuta ni Carlo nga usa diay ka langob ang iyang nahimutangan. Apan ang gigairan kaniya dili bato. Kun wala siya masayop, sama kini sa usa ka haligi. Nag-anam na’g katin-aw ang iyang panan-aw taliwala sa kangitngit. Sihay na ang kangiob. Apan dili pa maabot sa iyang panan-aw ang bungbong nga bato sa langob. Busa nabanabana niya nga ang giposasan kaniya usa ka kahoy nga giugbok taliwala sa wanang sa langob.

Nanuslok sa kaisipan ni Carlo kun unsaon niya pag-ikyas gikan niining iyang nahimutangan. Kinahanglang maluwas siya niining iyang kahimtang. Apan iyang nasuta nga maayo gayod siyang pagkagapos. Dagko ang pisi nga gibalighot sa iyang mga tiil ug kamot.

Unya dihay laing misapigad sa iyang alimpatakan. Nangita ang iyang hunahuna nila ni Arlin ug Inday Shantal. Nia kaha usab sila dad-a dinhi sa mga sakop sa kulto? Wala siya makakaplag og tubag sa pangutana nga iyang gisukna sa iyang kaugalingon.

Misulay siya sa pagpangusog. Apan ang kalig-on sa pisi nakigbatok sa iyang kusog. Nahisagmuyo siyang naghunahuna nga maglisod gayod siya pagluwas sa iyang kaugalingon niining iyang kahimtang karon. Lig-on gayod kaayo ang pisi nga gibaat sa iyang mga tiil ug kamot. -- Sumpayan pa