Gatas sa dagat

CEBU, Philippines - Buloy: Tinuod Toy nga nakapasol kag burger ug softdrinks?

Bitoy: Tinuod mo lang, una pag-itsa naku sa akong pasol burger akong nakuha.

Buloy: Ahhhhhh!

Bitoy: Pagsunod nakung labay softdrink na sab.

Buloy: Ahhhhhh!

Bitoy: Busoga hinoon, namasin kong makapasol og coleslaw.

Buloy: Unya nakuha?

Bitoy:   Na! ang nikubit ang chit na.(Toink! Estoryaheeeeee)

Kutob lang sa komedya ang bisan unsang pagkaon (gawas sa produkto sa dagat) o butang nga mapasol sa kadagatan. Apan ayaw lag ka highblood kun musopak nimo ang mga mananagat sa Dakbayan sa Talisay kay kun gatas ang hisgutan ila nang mapamatud-an.

Mengoy: Bay Siano tinuod nga nagkasingki ang M/V SuperFerry 2 ug M/V General Rumulo?

Siano: Mo lang…

Mengoy: Unya wala mag-oil spill?

Siano: Wala bay pero nag milk spill.(Toink!) hehehehehehehe

Posebling magatas gyud unta ang kadagatan duol sa parola diin magkasingki ang de pasahero ug kargo nga barko kun dili pa silyado ang putos sa pulbos nga gatas.

Inay matingob sa pagpamasol og isda ang mga mananagat nagpista hinoon pagpanikop sa mga kinartong gatas nga nahug gikan sa kargo nga barko.

Dihay asawa daling nanukot sa iyang bana sa kuha pagdunggo.

Mana: Oy Mano unsa may isda imong nadala ha?

Mano: Kuan ra day duha ka kartong BB……

Mana: Oy grasya duha ka kartong Bilongbilong?

Mano: Duha ka kartong Bear Brand. (Toink!) hehehehehehehehe.

Labaw nang nagpista ang mga silingan sa mga mananagat nga nakakuha sa mga kinartong gatas.

Gikan sa baybayon sa Barangay Tangke, Cansojong ug Poblacion sa Talisay bibo ang pinalitay sa gatas sa presyong P40 ngadto sa P50. Ang maong gatas og imong paliton sa tindahan mobalor og P84 bastante nga diskwento alang sa mga may batang gigatas. Wala hinoon sab paulahi sa linya ang utang.(Toink!)

Dihay asawa nga namaligya sa gatas nga nakuha sa iyang bana.

Mana: Day naa pay gatas dihang mapalit?

Senyang: Na nahurot na nang.

Mana: Wala diay ka magbilin para sa imong bana?

 Senyang: Ay dili man hilig og gatas akong bana nang.

Mana: Unsa man diay iyang hilig?

Senyang: Modidi ra.(Toink!) hehehehehehehe

Kun didto pa hinoon ni sa Japan mahitabo posebling tungod sa ilang ka disiplinado walay mopahimos pagkuha sa mga nahulog nga kinartong gatas.

Apan mabasol ba nimo ang mga mananagat nga nakakita og oportunidad taliwa sa kanihit sa isda?

Sa tulo ka mga mananagat nga akong nahinabi halos managsama lang ang ilang kuha nga isda nga wala kaabot og tulo ka kilo. Igo ra ipalit og bugas ug panud-an sa tibuok adlaw.

Usa sa nakapalit sa gatas nagmahay nganong 50 pesos lang iyang kwarta. Mas dako unta ang iyang matigom kun 3 ngadto sa 4 pa ang iyang napalit.

Grasya man nga mugna sa aksidente ang ilang napahimuslan mabasol ba nimo nga sa ilang kahagip-ot nangandoy sila’g susamang kahigayonan aron paghatag og gamay nga alibyo sa ilang kalisdanan.

(email:[email protected])