Anino sa Kulto

Naukay ang mga lumolupyo sa Mabini nianang adlawa pagkasayod nga nailhan na ang supremo sa Tambayawan Black Brotherhood nga mao si Maj. Dick Campo, ang hepe sa kapolisan sa lungsod. Naglisod pagtuo ang mga tawo, ilabi na kadtong mga nasuod na sa hepe, nga kini ang pangulo sa kulto nga maoy responsable sa mga krimen nga nahitabo sa Mabini. Bisan ang mga polis nga ilawom sa kamandoan sa hepe wala magdahom nga ang ilang opisyal mao diay ang walay kasingkasing sa pangulo sa kulto.

Nagpunsisok ang mga tawo sa kuwerpo sa kapolisan nga buot motan-aw kang Maj. Campo nga gisulod na sa atob. Apan gidid-an sila ni Carlo ug sa mga polis sa pagpakigsulti sa hepe. Lakip ang nangabot nga mga sakop sa local media gilimitan sa oras sa pagpakighinabi sa hepe nga usa na ka dinakpan.

Gusto ni Carlo nga makapahulay si Maj. Campo. Daghan pa siya’g gustong pakisayran niini kun makita niya nga relaks na ang hunahuna niini. Mao nga dili siya buot matugaw ang hepe sa mga tawo. Siya na lang ang mitubag sa buot masayran sa mga tawo. Gihatagan niya’g higayon ang hepe nga dili masamok sa mga maukiton.

Si Carlo mihangyo sa koordinasyon sa kapolisan mahitungod sa pagahimuon niyang lakang batok ni Maj. Campo. Mipasalig ang mga sakop sa Mabini PNP nga moabag kaniya.

Nagpabilin si Carlo sa kuwerpo sa kapolisan hangtod sa pagkagabii. Gusto niyang apongan si Maj. Campo.

May pipila ka mga elemento sa polisya nga nagpadayon sa pagpatrolya aron pagpangita nila ni Arlin, Inday Shantal ug Padre Daniel. Si Maj. Campo wala pa gayod motug-an kang Carlo kun hain dad-a sila si Arlin.

Mga alas diyes na kadto sa gabii, samtang nagkulukabildo sila si Carlo, Lt. Valera ug ang jail warden atubangan sa lamesa sa naulahi, kalit silang nakabatig kaguliyang didto sa gawas. Unya dihay milanog nga butobuto nga gisundan sa mga tig-ik sa kamatayon. – Sumpayan