Si Pekto nga dinaogdaog

"Oy, Pekto hugasi unya ang mga plato sa alababo ug pagkahuman lampasoi ang atong salog aron mosinaw," tugon pa sa iyang inahan nga si Iska nga talilakaw uban sa iyang igsoong lalaki aron sa pagpalit sa project sa eskwelahan sa naulahi.

Upat ka mga magsoon sila si Pekto. Duha ang lalaki ug duha usab ang babaye. Ikatulo siya gikan sa kamagwangan.

Apan napanid-an ni Pekto nga minos siya sa pagpangga ug pagmahal sa iyang inahan kay sukad sa gamay pa siyang bata ug hangtod karon nga bayong-bayong na siya, siya gyod ang han-okan sa mga gimbuhaton sa ilang panimalay.

Siya usab ang katabang sa iyang amahan nga si Tasyo sa pag-ugmad ug pagtikad sa gamay nilang oma nga gitamnan og mais ug mga lagutmon sa ilang konsumo matag karon ug unya.

May dose ka mga punoang lubi ang ilang yuta. Kutob ra sa kinto grado si Pekto kay dili man siya kaayo maayo sa ilang klase. Mao tong miundang siya sa pagtungha ug mitabang sa gimbuhaton sa ilang oma.

Kugihan si Pekto. Dili siya moinom ug manigarilyo. Labaw sa tanan dili siya barkadista. Laing hiyas niya mao ang iyang pagkadaginotan.

Usa ka higayon, nagmasakiton ang amahan ni Pekto ug nalaygay kini sa iyang balatian. Mao tong siya na ang gisangonan sa pag-atiman sa ilang gamay'ng oma.

Giabunohan ni Pekto ang ilang kamaisan lakip na ang mga lagutmon nga mga tanom. Lipang ug tambok kaayo ang tubo sa iyang mga tanom.

Nakabaligya siya sa abot sa oma ug nakasapi siya. Gisanggotan niya ang ilang mga lubi ug namaligya siya og tuba agig dugang sa iyang kita kon income.

Pilay estorya, namaayo ang iyang amahan sa iyahang balatian kay napatambalan man gyod siya ni Pekto og usa ka doktor sa ilang lungsod.

"Iska, ang nakatabang hinoon og dako kanato mao si Pekto nga dinaogdaog natong pagkaanak," nagkanayon si Tasyo usa ka higayon niana nga nagalingkod sa silyang tuwang-tuwang daplin sa ilang bintana.

"Bitaw, dili gyod nato matagna ang dagan sa panahon.Kadto hinoong mga pinalabi ug mga pinangga wala gyod kaamot bisan og usa ka diyot!" pintok nga temang ni Iska sa iyang bana. Busa, dili baya nato matagna nga ang tawong dinaogdaog mao hinuoy makatabang kanato ugma damlag. (Kataposan)