Mga Sugilanon Ang tulo ka amigo nga albularyo

Sakit nga Likuslikos o ugahip ang mitakboy sa iyang kalawasan karon. Anaa kini sa iyang bukobuko ug sa dughan mitapot. Kining maong sakit, daw may mga ngipon nga magpamaak sa iyang dughan ug sa bukobuko. Gipatan-aw kini niya sa amigo niyang arbularyo. Si Sotero Capisnon, sa San Roque, Lilo-an Cebu.

"Dilikado kanang sakita bay, ugahip kini nga likuslikos. Kun mag-abot gani kana sa tibuok mong lawas pilegro kana kaayo!" ni Sotero pa sa iyang paghiling sa akong gibati nga kasakit.

"Apan dili una ako modapat sa akong orasyon karon pagdala una sa lana sa lubi!" matud pa niya nga nagpanglingo sa iyang ulo.

Kini si Sotero Capisnon, nakapatambal na ako niini sa gibuyagan kung mga tiil. Nalata kini sa nuka. Katol usab kaayo magabii. Tungod sa iyang pagtambal naayo kadtong sakita. Sa iyang pagka arbularyo dili siya modawat sa kuwarta.

Mipauli ako sa balay nga wala gayod katambali ni Sotero Capisnon ang akong sakit nga likuslikos. Ang kasakit akong giantos!

Nahinumdom ako nga sa didto pa ako manimuyo sa Magoong, Linamon Lanao del Norte sa akong pagtrabaho sa Palao market, sa Palao Iligan City, isip usa ka 'labor' sa pamala kon "Palao market labor association' diin may kapin sa saysinta ka mga labor kami nga nagtrabaho didto.

Nalata usab ang tiil ko sa mga kagaw sa merkado. Tungod sa mga asin sa mga isda nga ayson sa mga lab-asero ug sa mga lab-asera. Daghan na kaayo ang mga tabletas ang natomar ko.

Apan wala gihapon ang sakit nako maayo. Busa midangop nalang ako sa amigo kong arbularyo nga si Roseto Caling, didto sa Bosquc, Linamon, Lanao del Norte.

"Kuyaw ning kagawa bay, gikan sa imong mga tiil. Misaka sa imong lawas, pilegro kini kun mosaka sa imong ulo!" ni Roseto pa, nga milingolingo sa iyang ulo.

Naayo ni Roseto ang sakit ko! Dili gihapon siya modawat sa kuwarta, sukad niadto, dili na ako sa mga doktor kaayo motuo! Kay ang ilang pagpanambal sa mga ospital, pulos gayod mga panguwarta.

Areglar ang gitawag sa panambal sa mga arbularyo. Sukad sa pagka tawo ko. Diin may panuigon na ako karon, nga 60-anyos, sa higayon may mga sakit ako, dili gayod magpatambal sa mga doktor.

Ang mga doktor laway o tutho sa mga arbularyo maoy patambalon ko. Kay sila nagsalig usab sa ilang gahom nga gihatag sa atong Ginoo. Hasta usab sa mga Santos o mga Santas nga maoy ilang gidebusyon.

Kining sakit ko karon, nga likuslikos o ugahip gipatan-aw ko kini usab, ni Noy Sael Leones, ang arbularyo sa Mapulo, Garing, Consolacion Cebu. Siya ang ikatulo kong amigo nga arbularyo.         Unya....

"Sulayan ko lang kini sa pagdapat sa akong orasyon. Dili usab ako makaseguro kun makaayo ba ako, pero salig lang kanako, ug sa Ginoo. Basin kining sakit mong gibati may alibyo!" ni Noy Sael pa, nga mitambal usab kanako.

Sama kanila ni Roseto ug Sotero, ang manambal kong meriko, si Sael Leones naayo usab ako. Daghang salamat kanila ug sa atong Ginoo, nga sila mga arbularyo nga instrumento gayud ni Jesus Kristo! (Kataposan)