Kamatayon sa Panumpa - Gula 14

“Mao gyud kaha kanay tinuod nga hinungdan?”

“U-unsay buot mong ipasabot?”

“Tingalig di lang gyud ka ganahang makigkuyog nako?”

“Ayaw laina sa pagsabot ang akong pagbalibad. Nakita man sab bitaw nimo ang sitwasyon. Di mahimong isalig nako sa lain ang akong mga baligyang pagkaon.”

“Okey. Di ko mamugos. Pero I hope nga di na ko nimo balibaran sa sunod higayon.”

Wala motingog si Xenia. Pagkataudtaod, mibiya na si Gordon sa iyang nahimutangan.

Nakapanglingo si Xenia. Kaniadto pa gyud nga nagsige’g birig-birig si Gordon kaniya. Pero dili mahitabong patolan niya ang maong polis.

Pagkasunod adlaw, sila nang duha si Xenia ug Nanay Lourdes niya ang nanindag mga pagkaon sa ilang puwesto sa gawas nga bahin sa Metropolitan Cathedral.

Nagkapuliki sila’g atiman sa daghang mga pumapalit. Basta adlaw’ng Biyernes daghang mga tawo sa dapit nga ilang gipuwestohan, mga manimbahay ug mga lumalabay nga mohapit sa pagpalit og pagkaon sa ilang puwesto.

Pagkapalis, dili na kaayo daghan ang namalit sa gibaligya nilang mga pagkaon. Nananghid si Xenia sa iyang inahan nga modalikyat una siya ngadto sa Colon kay duna siya’y paliton. Misanong ang iyang inahan. -- Sumpayan pa