Puto-maya - Gula 1

Puto! Puto-maya! Puto mo diha!

Nabatasan ni Gabriel nga sayo g’yud kaayo sa buntag nga mamaligya na siya’g puto-maya sa kabalayan sa pipila ka sitio sa barangay Pasil.

Daghan kaayo siya’g suki kay tag singko pesos ra ang baligya niya sa matag putos sa iyang puto-maya dili sama sa uban nga tag P6 ang baligya.

Sagad g’yud nga inig-abot ni Gabriel sa daghang kabalayan sa usa ka sityo sa barangay Pasil, punsisokan dayon siya sa iyang mga suki. Ang uban sa iyang mga suki utang-utang ang paagi, bayad matag Domingo kay Sabado man ang ilang sweldo.

Nailhan ra ni Gabriel ang uban sa iyang mga suki pinaagi sa ilang hitsura. Usa kanila ang gwapa nga babaye nga pirmi na nga mag-utangan kaniya apan wala siya makapangutana sa ngalan.

Sa iyang listahan sa mga utang, gibunyagan ra niya’g “Hubag” ang maong gwapa nga babaye nga tig-utangan kaniya’g puto-maya.

“Dili usa ko makabayad nimo karon ha kay naapiki ko sa budget, pwede ra?” matud sa gwapa nga babaye nga nagpauwahi g’yud pagduol kang Gabriel nga naglingkod sa lingkoranan.

May kalit nga misantup sa huna-huna ni Gabriel. “Walay problema gwapa. Maghuwat ra ko kun may kwarta ka na. Apiki diay ka’g budget karon?,” gipangutana ni Gabriel ang gwapa.

Sa ilang pagsultihanay, nahibaw-an ni Gabriel nga Glenna diay ang ngalan sa maong babaye. Minyo na kini apan wala pay anak ug ang bana gamay ra’g sweldo.

“Pirmi lagi ko nga maproblema sa budget sa balay uy. Bisan og puto-maya ra gani ang among kan-on sa buntag apiki lang gihapon sa budget,” saysay ni Glenna sa suki niya nga tigbaligya’g puto-maya.

Gitutokan ni Gabriel si Glenna. Daw nagtubod ang iyang laway nga nagsud-ong sa maanyag niini nga panagway. “Ayaw laina pagsabut gwapa gusto ko nga motabang nimo,” matud ni Gabriel. Gikuha ni Gabriel ang giandam na niya nga tibuok P500 nga gipilo-pilo niya’g gamay kaayo, dayong tunol kang Glenna.

“Gamita usa na kun may gastohan ka Glenn,” matud ni Gabriel nga ang tinan-awan klaro kaayo nga nagpasabot og pagbati ngadto sa gwapa niyang customer.

Naandan na nga matag semana, may itagana na gayud si Gabriel nga tag P500 nga ihatag kang Glenna. Wala siya masayop, nakapagaan kini sa pagtagad ni Glenna kang Gabriel.

“Nganong gamay ra man ang imong kuhaong puto-maya karon Glenn?” nangutana si Gabriel kay duha ra man ka putos ang gikuha sa iyang amiga. “Da, nag-away mi ug ang akong bana. Gamay ra kaayo ang gihatag nga sweldo gabii,” ni Glenna pa.

“Makigpanuroy ko nimo unyang hapon Briel kun may time ka kay para malingaw ko,” matud ni Glenna. Daw nakalitan si Gabriel. (Sumpayan)