Anino sa kulto - Gula 192

“Tubaga, Sarge,” giingnan ni Carlo ang warden. Tulpoka kanang nagsiga sa kilid ug ipaod sa imong dalunggan.”

Gibuhat sa sarhento ang iyang gisulti.

“Hello?” ni Carlo pa sa iyang cellphone.

“Hello!” Tubag sa sarhento didto sa gigunitan niining relo. Apan dili tingog sa sarhento ang nabati ni Carlo kundili tingog sa usa ka babaye. Ang tingog sa supremo sa kulto!

“Hello?” Miusab si Carlo aron pagseguro nga wala siya masayop sa iyang nadungog.

“Yes, hello,” tubag usab sa sarhento didto sa relong Omega. Gisublisubli nila kini sa makadaghan. Apan mao gihapon ang nahitabo. Dili ang tingog sa sarhento maoy nabati ni Carlo kundili ang tingog sa babaye nga kanunay manawag kaniya sa cellphone -- ang supremo sa kulto!

Dinhi nasabtan ni Carlo ang tanghaga. Ug nakapanglingo siya sa kamatuoran nga nadiskubrehan. Gi-off niya ang iyang cellphone ug gikuha ang relong Omega gikan sa sarhento.

Gisundan pagtan-aw sa sarhento ang relong Omega nga diha na sa iyang mga kamot. Ingon sa dili kini makatuo nga magamit usab nga telepono ang maong relo de pulso.

Miduol si Carlo sa selda nga nahimutangan ni Maj. Campo.

“Utokan ka gyud, Maj. Campo,” matud ni Carlo. “Mao diay nga dili ka mailhan sa imong pagtakoban tungod kay may communication gadget man diay kining imong relo nga makapausab sa imong tingog ngadto sa tingog sa usa ka babaye.”

“Nagtuo ka nga kamo rang mga sakop sa VIDA ang nakabaton og modernong mga kahimanan?” Sa hepe pa nga ingon sa nakabaton na’g kaisog sa pagpakigharong ni Carlo. “Aduna sab kami niana. Daghan na ganing naggamit niana sa mga sakop sa Al Qaeda Network.”

“Apan gigamit mo kini sa daotan nga paagi,” misikmat si Carlo. “Gibuhat ko kini tungod kay akong nakita nga huyang ang balaod sa yuta.” “Mao ray nakapabor ang anaa sa gahom kay nahimo nila ang tanan nga gusto nilang himuon.”

“Unsa ba gyu’y imong tumong nga misagop ka man niining matanga sa kalihokan?” Gitutokan ni Carlo ang hepe. “Nganong nagpasakop ka man sa kulto?”-- Sumpayan pa