Dakpa ninyo ang akong anak

Senyora, gilugos ko sa imong anak, misumbong ang sulugoon sa iyang among babaye. "Kanus-a kini mahitabo?" "Kagabii lang, senyora, misulod si Terry sa akong lawak ug giti-onan niya ako sa iyang pistola."

"Naunsa na ba ning bataa, oy nga nagpabadlong man?"

"Dili naman na siya bata, senyora kay bayente singko na man kaha na."

"Sige lang, Dora,kay akoy mahibawo nga mosulti niana.Ayaw lang pagsaba og lain, o, niay kuwarta, usa ka libo na, imo na na, pamalit didto sa imong mga kinahanglanon."

Ingon niana kamaayo ang agalon ni Dora, dali ra kaayong mogawas ang kuwarta labi na mahitungod sa mga problema sa iyang anak. Dili siya makaako sa pagbadlong niini. Kini tungod kay pinatumanan kini sa amahan bisan unsay pangayoon. Apan karon nga patay na ang iyang bana, siya ang nag-antus sa kaabusado sa iyang anak.

Unya, usa ka gabii niana, "Pirmahe ring withdrawal, ma, kay akong kuhaon ni sa banko ugma."

"One hundred thousand! Kadako ining kuwartaha, Terry, unsaon man ni nimo?"

"Mangutana ka pa gyud kun unsaon, natural akong gastohon," pinabundak ang tingog sa anak.

"Di ko kana pirmahan," nagmagahi ang inahan.

"Ayaw ron ni'g pirmahe," dayong hulbot niini sa iyang .38, "kay buslotan ko ning imong ulo," dayong tion niini sa sintido sa inahan. Gipirmahan kini sa inahan day'ng lakaw sa anak nga way pupanamilit.

Nianang gabhiona, miabot si Terry nga nagkadugo. "Unsay nahitabo, Terry?"

Nakapatay ko, ma! Itago ako kay gigukod ko sa mga polis."

"Sulod diri, anak," may gibuksan nga sekretong lawak ang inahan. Wala madugay, may nanuktok. Giablihan kini sa inahan.

"Mga polis, kami. Nakapatay ang imong anak, senyora."

"Wala pa mauli ang akong anak, hepe."

"O, sige, dili na mi magdugay, apan itawag dayon namo kun nia na ang imong anak," dayong lakaw sa mga polis.

Usa ka oras lang ang gipalabay sa inahan ug miabot ang mga polis. Daan nang bukas ang pultahan segon sa instraksiyon sa inahan nga dili sila motuktok kondili mosulod dayon. Nagkaon si Terry pag-abot sa mga polis.

"Arestado ka, Terry!" matud sa hepe.

Modagan unta si Terry apan nagunitan dayon kini sa usa ka polis ug giposasan.

"Kinsay nagsumbong nga nia ko dinhi?" Misinggit sa kasuko si Terry.

"Ako, anak," mitubag ang senyora, "aron maputol na ang imong kaabusado. Ibilanggo ninyo siya, hepe, ug ayaw ninyo siya buhii hangtud dili niya mabayran ang katapostaposang diyut." (Katapusan)