Anino sa Kulto

Wala’y nahimo si Maj. Campo gawas sa pagtuman sa mando ni Carlo. Mitalikod kini ug gipataas ang mga kamot. Apan nagpangli ngi kang Carlo. Kilatnon nga milihok si Carlo. Kalit niyang gitapuk-an si Maj. Campo. Gidis-armahan niya kini ug giposasan nga gibinaklid. Ang relong omega nga gigunitan niini iyang gikuha. “I-ibalik kana kanako, Carlo,” nagkanayon si Maj. Campo nga nahisama sa usa ka bata nga nangulipi sa miilog sa dulaan niini.

“Gikasubo ko,” matud ni Carlo. “Kinahanglang mahimulag kini kanimo tungod kay kini ang gihimo mong instrumento sa imong paglingla sa katawhan.”

Gimandoan ni Carlo si Maj. Campo sa paggawas sa CR. Mipakita kadto’g pagtutol ang hepe apan napugos kini dihang iyang gitukmod. Apan maila ang pagsuki sa kahiladman sa hepe diha sa kitiw sa mga tiil niini. Nag-una sa paglakaw ang hepe nga sa matag karon ug unya magpanglingi kang Carlo nga nagsunod. Si Carlo nakaagpas sa gipakitang lihok niini. Ang iyang kamot kanunay’ng naggunit sa Uzi nga ang sumbohan nagapunting kanunay sa bukobuko sa hepe.

“Ayaw gayod pagpakasayop sa imong mga lihok, Maj. Campo,” mipasidaan si Carlo, “kun dili ka gustong matapos karon dayon ang imong kinabuhi. Dili ko magpanuko sa pagpatay kanimo oras nga makahimo ka’g sayop nga lakang.”

Si Maj. Campo nahisama sa usa ka bihag nga karnero nga miduko na lang ug nagpaawot. Nabanabana lang ni Carlo ang kahisagmuyo nga gibati niini. Daw wala gayod kini magdahom nga mahimo niyang dinakpan.

Nakurat ang jail warden pagkakita kang Maj. Campo nga giposasan nga gisunod ni Carlo. Ingon sa dili usab kini makatuo sa nahitabo sa hepe. Naglibog.

“Ablihi ang selda numero 2, Sarge,” gimandoan ni Carlo ang warden. Ang warden wala na lang magkutikuti. Gituman niini ang sugo ni Carlo. Giablihan niini ang pultahan sa selda nga wala pay sulod nga binilanggo.

Gimandoan ni Carlo si Maj. Campo pagsulod sa selda. Ang hepe ingon sa nagtungok sa atubangan sa nagtingabngab nga pultahan sa atob. Dihang wala dayon kini mokihol, gitukmod kini ni Carlo. Napugos ang hepe pagsulod sa lawak nga girehasan og puthaw. Giserhan dayon sa warden ang pultahan sa bilanggoan sa didto na ang hepe sa sulod. -- Sumpayan pa