Anino sa Kulto

Migawas si Maj. Campo sa conference room aron moadto sa CR. Igo lang kining gipasundan ni Carlo sa iyang panan-aw hangtod nga nakagawas kini sa pultahan.

Samtang nahabilin sa conference room ug nagpaabot kang Maj. Campo, layo ang giluparan sa hunahuna ni Carlo. Nagkagukang ang iyang handurawan sa daghang mga talan-awon. Diha sa iyang hunahuna natibuok ang nagkalainlaing mga lakang labot sa pagmatuod nga si Padre Daniel mao ang pangulo sa kulto nga responsable sa nahitabong mga krimen sa lungsod sa Mabini. Dihay mga laraw nga migimok sa iyang alimpatakan, mga laang ug mga tudyok nga dili unya kalikayan sa pari. Ingon sa mibati siya’g kahinam nga naghunahuna sa umaabot nga mahitabo. Gusto na niyang makita ang mga makasasala nga pinasasan ug dili makahimo sa pagpataas sa ilang mga agtang.

Taudtaod na siyang naghulat kang Maj. Campo. Wala pa gyud mahibalik ang hepe nga atua sa C.R. Mipailob siya. Milabay ang lima ka gutlo ug wala pa gihapon mahibalik ang hepe. Mitindog siya nga mibati na’g kalaay. Nakahunahuna siya sa pag-agpas ni Maj. Campo didto sa CR. Nahibulong siya kun nganong nalangan kini didto sulod sa CR.

Sa nagdangadanga na siya sa pultahan sa CR, iyang nabati nga daw may nagsultihanay didto sa sulod. Tingog ni Maj. Campo ang iyang nadungog. Ambot kun unsay nahasulod sa iyang ulo, mihinay siya pagduol sa pultahan sa CR. Kalit mikuba ang iyang dughan. Mainampingon niyang gipakang-a sa palid sa pultahan ug milili ngadto sa sulod.

Wala siya masayop. May gikasulti gayod si Maj. Campo, apan dili sa cellphone niini. Nakita niya nga ang relo niini nga omega maoy gigamit niini sa pagpakigsulti sa ambot kinsa nga nanawag o gitawgan niini. Mibati siya’g kahibulong sa iyang nakita. Nakahukom siya sa pagpaniid. Ug kini maoy iyang nabati:

“Maayo ang inyong gibuhat,” nagkanayon ang hepe nga ingon sa gituyo pag-usab ang pamunto sa sinultihan niini, pinahinay. “Bantayi gayod ninyo nga dili sila makaikyas ilabi na ang bata. Kinahanglang mamatay kanang bataa kay siya ang moguba sa atong kaugmaon dinhi sa kalibutan.” -- Sumpayan pa