Kamatayon sa Panumpa

Gula 9

“Dugay-dugay na man nga wa mobisita si Kendall dinhi sa ato, anak,” nagkanayon si Nanay Lourdes usa ka higayon niana samtang namahaw sila. “Unsa bay nahitabo ninyo, ha?”

“Busy lang tingali siya sa pagpangandam, Nay,” ni Xenia pa. “Hapit na man gud siya molarga paingon sa UAE.”

“Maayo unta’g makaduaw siya dinhi sa dili pa siya mogikan paingon sa gawas sa nasod.”

“Paaboton lang nato siya, Nay.”

Milabay ang usa ka bulan. Si Kendall wala na gayod makigkita ni Xenia. Wala na sila’y komunikasyon. Hangtod nga nabalitaan na lang sa dalaga nga nahinayon gayod ang paglarga niini ngadto sa gawas sa nasod.

Nahisagmuyo pag-ayo si Xenia. Misamot ang gibati niyang kahiubos kang Kendall. Mibiya si Kendall sa ilang dapit ug milarga paingon sa gawas sa nasod nga wala na lang mananghid ug magpahibalo kaniya.

Misamot ang kadako sa pagtuo ni Xenia nga wala na siya’y bili alang kang Kendall human sa nahitabo kanila. Human niya ikatugyan ang iyang kaugalingon ngadto niini.

Nagtuo gyud si Kendall nga dili na siya birhen nga pagka-babaye sa dihang giangkon siya niini sa labing unang higayon. Ug kini ang nakapabugnaw sa ilang relasyon. Tungod lang kay wala siya mag-bleed sa una nilang engkuwentro sa kama, gihukman na siya ni Kendall nga dili na virgin. -- Sumpayan pa