GULA 187
“Pero wala magdala’g sakyanan si Padre Daniel sa iyang pagbiya sa kombento, kagabii,” ni Maj. Campo pa.
“Tinuod kana,” ni Carlo pa nga nakatugkad kun unsay buot palutawon sa hepe. “Apan may kaugalingong sakyanan ang mga sakop sa kulto. Usa na niini kadtong awtong itom nga nabungkag atol sa akong pagpakigsangka sa mga sakop sa kulto nga buot mopatay kanako. Gawas niadtong maong sakyanan, may nakita usab akong sakyanan nga nagpaatbang sa akong gipuy-an niadtong gabii nga misulti kanako si Tiya Marta mahitungod sa mga tinagoan sa kulto.”
“Naglibog na ko’g maayo sa mga panghitabo karon, Carlo,” matud sa hepe. “Sakyan ko na lang kanang imong ideya. Sutaon nato kun unsa ka tinuod kanang imong mga katahap.”
Wala motubay si Carlo sa gisulti ni Maj. Campo.
“Mamalik una kita sa kuwerpo,” sugyot ni Maj. Campo. “Maghimo ko’g briefing sa akong mga sakop labot niining hitaboa.”
Misanong si Carlo.
Sulod sa hamugaway ug aircon nga conference room sa kuwerpo sa kapolisan gipahigayon ni Maj. Campo ang pag-briefing sa iyang mga sakop. Nagtindog siya sa ilang atubangan nga nagbitbit og pointer nga kahoy. Si Carlo nagpabilin sa iyang gilingkoran.
Gitagsatagsa pag-at-at ni Maj. Campo ang iyang mga plano. Gimandoan niya ang iyang mga sakop sa pagpangita kang Padre Daniel. Si Carlo igo lang namati sa gipahigayon nga briefing ni Maj. Campo sa mga sakop niini.
Nahuman ang briefing sulod sa napulo’g lima ka gutlo. Ang mga polis nga nanambong nag-ulos pagpanggawas sa conference room. Wala una manggawas sila si Carlo ug Maj. Campo.
“Mag-CR una ko, Carlo,” matud ni Maj. Campo. “Paabota ko’g kadiyot.” “Padayon lang, Dick,” ni Carlo pa. -- Sumpayan pa