Anino sa kulto

Gula 186

“Unsang orasa nga milakaw si Padre Daniel kagabii, Dong?” Laing pangutana ang gipasupot ni Carlo.“Wala kaayo ko mahinumdom sa oras, Sir,” sa hardinero pa. “Basta pagkahuman namo’g panihapon, kalit lang nawagtang si Padre Daniel. Nagtuo kami nga migawas lang siya sa kombento ug nagpahangin. Apan hangtod kaganinang buntag wala gayod mahiuli ang pari. Kaming tanan dinhi sa kombento pulos walay kasayoran kun hain siya karon.”

Nakahinuktok si Carlo. Ang kabalaka nga mibatog sa iyang hunahuna inanay nga nangitlog, ug kini nahimong bulto sa usa ka bakak nga kamatuoran. Nakaginhawa siya’g halawom.

“Usa na lang ka pangutana, Dong,” gikan ni Maj. Campo. “Kanunay bang buhaton ni Padre Daniel ang paglakaw nga dili magpahibalo kaninyo kun asa siya paingon?”

Milingolingo ang batan-on. Niya pa, “kagabii lang nahitabo, Sir, nga milakaw ang pari nga wala mananghid kanamo.”

“Daghang salamat, Dong,” ni Carlo ngadto sa batan-on,” sa mga kasayoran nga imong gihatag kanamo.”

Human makigsulti sa hardinero, namalik sila si Carlo ug Maj. Campo sa nahimutangan sa ilang gisakyan. Naghinuktok si Carlo sa sulod sa awto.

“Unsay imong gihunahuna, Carlo?” Gitikdolan sa hepe ang pipila ka kunot nga mibathay.

“May kalabotan gayod si Padre Daniel sa nahitabo nila ni Arlin ug Inday Shantal,” laktod nga tubag ni Carlo. “Ang giasoy sa hardinero lig-on kaayong sukaranan nga tinuod ang akong katahap. Kagabii rang milakaw ang pari ug hangtod karon wala kini mahiuli. Dili ko modawat nga pure coincidence kining hitaboa. Kompirmado na. Milakaw ang pari kagabii kay mikuyog sa iyang mga sakop nga maoy nagkuha nila ni Arlin ug Inday Shantal didto sa Carmen. Ang pamahayag sa hardinero motakdo sa giasoy kanako ni Roding Sarong, ang manghod ni Jimmy. Alas 11:30 kuno nahitabo ang pagdagit sa mga sakop sa kulto nila ni Arlin ug Inday Shantal. Ug si Padre Daniel mibiya sa kombento human sa panihapon. Ibutang ta nga nahuman sila’g panihapon mga alas siyete o alas otso. Ug kay duha man ka oras kapin ang pagdagan sa sakyanan paingon ngadto sa Carmen, sa ato pa, nahiabot sila didto mga alas onse na gyud.” -- Sumpayan pa