Andot, maayo na hinuon kay aduna nay bag-ong doktor nga nanimuyo sa lungsod, notisya pa ni Salud nga iyang asawa nga bag-ohay pa lang nahiabot sa pagpangompra og ilang konsumo sulod sa usa ka semana.
Tabo sa ilang lungsod matag Domingo kay ang mga mag-uuma ug mga mangingisda magdala sa ilang mga produkto og kuha sa merkado sa lungsod.
"Aw, maayo hinuon Salud kay aduna nay mipuli kang doktor Potot nga dugay nang mitaliwan ngadto sa laing kalibotan. Talianak na ra ba na si Kolasa ug kinahanglan ubanan mo siya sa klinika sa giingon mong doktor aron ma-chek-up na siya sa dili pa siya manganak", temang pa ni Andot ngadto sa iyang asawa nga nanglimpiyo sa lab-as nga isdang bawo aron tuwaon ug isuwa nila sa paniudto.
"Mao gyod nay mahitabo unya," tubag pa ni Salud nga karon nagtak-ang na sa tinuwang bawo sa sug-angan nilang bato.
Usa ka gabii niana samtang nagabunok ang ulan dinuyogan sa masipang dogdog ug kinidlap sa masanag nga kilat, nagping-it si Kolasa nga ilang anak sa hilabihang kasakit sa iyang tiyan ug wala pa ra ba siya makapa-check-up didto sa lungsod.
"Arayyy, kasakit sa akong tiyan morag adunay naglimbag-limbag ug nagpanikad sa akong kutokuko. Manganak na tingali ko!" singgaak nga dala og pakilooy ang tingog ni Kolasa.
"Andot pangita dayon og kasakyan padulong sa lungsod kay dalhon nato si Kolasa sa lungsod kay manganak na siya siyam na god ka bulan nang iyang tiyan nga nagasabak" awhag pa ni Salud ngadto kang Andot nga nagbukhad na og banig aron pagpahulay ning matugnaw'ng kagabhion.
Pilay estorya, nangita dayon si Andot og kasakyan nila padulong sa lungsod. Mituang na ang ulan. Alas otso na ang takna sa kagabhion.
Maayo gani kay nakita ni Andot si kumpare Ponyong niya nga bag-ohay pa gyong migarahe sa ilang traysikol nga de pasaheroan.
Nagkasabot dayon sila. Ilaha dayong gikarga si Kolasa sa sakyanan inubanan sa iyang inahan nga si Salud.
Misirit ang dagan sa traysikol kay mingaw na man ang karsada ning taknaa sa kagabhion. Miabot na sila sa klinika ni Dr. Pugoy.
Paghitangka nila sa pultahan sa klinika, nahibulong si Andot og mga kaubanan kay aduna may dakong iro bulok puti nga gipahigda sa 'stretcher'.
"Unsay ato?" pangutana sa doktor kang Andot. "Maayong gabii dok, manganak na kining among anak nga si Kolasa," dayong lingi ug tudlo ni Andot ngadto kang Kolasa nga nagsige gihapon og ping-it sa kasakit inubanan sa inahan nga si Salud.
"Sorry kaayo kay alang sa inyong kasayoran usa ako ka doktor sa hayop sama sa iro ug iring. Dili ko doktor sa tawo," patin-aw pa ni doktor Pugoy.
"Daghan ang klase sa mga doktor karong panahona. Adunay doktor sa edukasyon, doktor sa hayop ug doktor usab sa tawo. Ug may doktor sab kita nga Binisaya. Kanang gitawag ba nila og albularyo," pamahayag pa ni doktor Pugoy.
Nakaluy-an lang siguro sa Diyos, nakaanak na lang gyod si Kolasa niadtong tungora nga wala maglisod diha sa klinika.
Busa, kinahanglan klarohon ug suhitoon usa nato ang usa ka butang sa dili pa kita molihok kay ma-wrong number unya ta sama sa kang Andot ning atong sugilanon. Di ba? (Kataposan)