Nanggawas sila sa hotel nga walay tingog-tingog. Wala na ihatod ni Kendall si Xenia. Nag-inusara na lang siyang mipauli sa iyang gipuy-an. Mipauli siyang nagbalon og kahiubos kang Kendall.
Hinuon, na-realize ni Xenia nga dili niya mabasol si Kendall kun nganong wala kini motuo nga virgin pa siyang giangkon niini. May sukaranan ang pagduda ni Kendall nga may laing lalaki nga nakauna sa iyang pagka-babaye tungod lagi kay wala man siya mag-bleed sa una nilang engkuwentro sa kama. Wala sab siya mobati’g kasakit.
Apan nakaseguro si Xenia nga si Kendall ang unang lalaki sa iyang kinabuhi nga nakahilabot sa iyang pagka-babaye. Maglisod lang gyud siya sa pagpasabot niini ngadto kang Kendall.
Nagmuok si Xenia sulod sa iyang lawak sukad sa iyang paghiabot. May mga higayon nga mohilak siya gumikan sa naghingapin nga kahimangod. Wala siya masayod kun unsay angay niyang buhaton.
Dihang nagabii, nanuktok sa pultahan sa iyang lawak ang iyang Nanay Lourdes. Gipahibalo siya niini nga manihapon na sila.
“Mosunod na ko, Nay,” giingnan niya ang iyang inahan nga didto ra sa gawas sa pultahan sa iyang lawak.
Atubangan sa talad-kan-anan, walay tingog-tingog si Xenia. Nagtimitimi siya sa pagkaon. Nawad-an siya’g ganang mokaun. -- Sumpayan pa
Anino sa Kulto
Ni Rosalie Vallecera
Tungod kang Padre Daniel, Dick,” gibungat na gayod ni Carlo ang buot niyang ipadayag. Ang kayugot mihinayhinay pagkamang sa iyang galamhan. ”Gitug-anan diay ni Tiyo Berto si Padre Daniel kun hain ang bata tungod kay nagsukit-sukit kini kaniya. Misalig si Tiyo kaniya tungod kay usa man lagi siya ka alagad sa Dios. Apan natibuok ang akong katahap karon. Usa lang diay ka plantalya ang iyang pagkapari aron pagtabon sa tinuod niyang bulok. Usa diay usab siya ka sakop sa kulto sa mga demonyo.”
Wala makatingog si Maj. Dick Campo. Midiyong lang ang mga mata niini nga mitutok kang Carlo Guieb. Ingon sa naglisod ang hepe pagtuo sa gisulti sa sekreta. May mga sukna nga gipasupot sa tinan-awan niini sa detektib.
“Hugot ang akong pagtuo, Dick,” mipatin-aw si Carlo pagkilab sa pipila ka daklit “nga dako’g kalabotan si Padre Daniel sa nahitabo nila ni Arlin ug Inday Shantal.”
Nagpabilin sa kahilom si Maj. Campo. Mikipatkipat ang mga mata niini nga mitan-aw kaniya.
“Gawas kanato, siya lang ang nasayod kun hain nato dad-a ang bata uban sa inahan niini,” mipasabot si Carlo. “Klaro kaayo nga may kalabotan siya sa pagdagit kanila ni Arlin ug Inday Shantal. Sakop usab kanang paria sa Tambayawan Black Brotherhood.”
“Bug-at kanang imong gipasangil ngadto sa pari, Carlo,” mipahinumdom si Maj. Campo.
“Nasayod ko, Dick,” niya pa. “Apan may lig-ong sukaranan ang akong mga katahap. Nagduda gani ko nga posibleng siya ang supremo sa kulto.”
“U-unsa?” nakalitan si Maj. Campo sa giluwatan niyang mga pulong. “Apan imposible tingaling mahitabo kana, Carlo.”
‘Dili imposible, Dick,” gitutokan ni Carlo ang hepe. “Usa siya ka pari busa dali ra siyang makadani sa katawhan. Mao kini hinungdan nga daghan na ang misagop sa tinuohan sa kulto dinhi sa Mabini tungod kay ang pari man maoy nagpaluyo niini.” -- Sumpayan pa