Sex Scandal

Gula 6

Buhong kaayo sila si Rodney ug Tessa sa ilang daw honeymoon sulod sa kubol-kubol nga nahimutang sa rooftop sa BBRC. Gabii na nga migawas si Tessa gikan sa kubol-kubol ni Rodney ug mibalik sa selda sa mga piniriso nga babaye.

Nakahimo g’yud sila og tulo ka hugna sa ilang kumbati. Gihatud ni Rodney ang iyang hinigugma kutob sa pultahan paingon sa selda sa mga babaye.

Milabay ang mga adlaw, semana ngadto sa mga buwan. Subo ang panagway ni Tessa atul sa panagtagbo nila didto sa pultahan nga puthaw nga nag-uwang sa selda sa mga lalaki ug babaye.

“Rod, duha na diay ka buwan ko nga mabdos,” may pagkaluya ang tuno sa tingog ni Tessa. “Mao ba Tess? Walay problema kay andam ko nga mangasawa nimo,” dali nga tubag ni Rodney.

Gililong sa mga tinugyanan sa BBRC nga dunay piniriso nga dalaga nga mimabdos samtang gitanggong sa bilanggoan. Dili ikalimod nga si Tessa mimabdos diha sa BBRC kay dugay-dugay na siya nga nabilanggo.

Laing mga adlaw, semana ug mga buwan ang milabay sa walay pagkapuol nila nga pagminahalay ni Rodney ug Tessa.

Bisan og daku na ang tiyan ni Tessa apan mobisita gihapon siya sa kubol-kubol ni Rodney ug dimdimon gihapon nila ang dugam-is sa gugma.

Usa ka adlaw, usa ka reporter sa THE FREEMAN gitug-anan ni Capt. Gonzales nga may babaye nga piniriso nga nanganak sulod sa selda sa mga babaye.

Ang reporter sa THE FREEMAN nga si Rene Borromeo maoy mihimo’g pakisusi niini ug misuwat sa maong balita sa pamantalaan.

Wala damha nga ang napublikar nga balita nga dunay piniriso nga babaye sa BBRC nga nanganak nakapadasig sa tagdumala sa Gaisano Main nga mohatag og hinabang salapi.

Ang maong reporter sa THE FREEMAN maoy mihatag sa tseke ngadto kang Tessa nga nakapahimuot kaayo sa ubang piniriso.

Daw nagdala og debuenas ang anak nila ni Rodney ug Tessa kay nag-ulhos-ulhos lang sa pagka dismiss ang mga kaso nga gipasaka batok kanila. Una nga nakagawas si Rodney, dayon duha ka semana ang milabay, si Tessa na sab.

Nagpakasal sila ug nanginabuhi nga malinawon. Karon, si Rodney may kaugalingon na nga jeep nga pasaheroan nga maoy iyang gikuhaan og panginabuhian samtang si Tessa dunay tahianan.

Usa ka gabii, nakahukom sila nga manuroy sa sikat na karon nga IT Park. Wala tuyoa nga nalantaw nila ang kanhi BBRC ug inanay’ng nanumbalik sa ilang panumdoman ang kasugiran sa ilang kaagi sulod sa bilanggoan.

“Kanang karaang prisohan Rod kabahin na sa atong kinabuhi kay diha nato gigambalay ang atong tigbayon sa pagminahalay,” matud ni Tessa. (Kataposan)