Mogula matag Biyernes

I could not be intimidated by any lawyer!" ni Dr. Edward Cuenca ngadto ni Atty. Rel Becalas paghibalik og lingkod sa doctor dapit sa tumoy sa lamesa. Istrikto ug mapasegarbuhon iyang tuno sa sinultihan. Naminaw si Ritche Tibon ahente nga kauban sa doctor, naglingkod dapit sa tuo sa mananambal. Hasta si Mary Grace Bacus nga kliyente sa abogado, naglingkod dapit sa wala sa doctor. Nag-abot sila ning sayong kahapunon sulod sa Green Meadow Coffee sa Subangdaku, Mandaue. Wa nitingog dayon si Atty. Becalas nga naglingkod dapit sa laing tumoy sa lamesa sa wala ni Mary Grace.

Ang lamesa diin sila naglibot og panglingkod, rektanggulo nga dos metros cuadrados. Sa kasapang tumoy, diha naglingkod si Dr. Cuenca. Sa silangang tumoy diha naglingkod ang abogado. Sa tuo sa doctor, si Ritche. Sa tuo ni Atty. Becalas, si Mary Grace nga maoy nihangyo sa abogado nga kuyogan siya ining panagtigum karon. Kay nahadlok si Mary Grace ni Dr. Cuenca ug ni Ritche. Kay sa mensahe sa mga teks ni Ritche ug sa doctor, gihulga si Mary Grace nga ikiha og estafa.

Nagsugod ning problema tali ni Dr. Cuenca ug Mary Grace sa pagpinirmahay nila og kasabutan. Sa dokumento, nagkasabot sila nga paliton sa doctor ang yuta ni Mary Grace sa Dumaguete nga usa ka hektarya. Nagkasabot sila sa presyo nga dos milyones ka pesos. Ang katunga, gibayad na niadtong Mayo 15. Ang laing katunga bayran sa Hulyo 15. Ubos sa kondisyon nga kun dili kabayad ang doctor sa laing katunga inig lapas sa petsa, manulo ang kontrata. Ug ma-forfeit ang nabayad isip liquidated damages. Wa kabayad sa balans ang doctor. Nilapas ang duha ka semana. Nipadala dayon og sulat si Mary Grace ngadto sa doctor.

Nihangyo ang doctor pinaagi sa teks nga hatagan siyag lugway'ng panahon. Kun dili mokiha siya. Nisugot si Mary Grace pero dunay penalty nga P200,000. Imbis ang balans usa ka milyon na lang, mahimong P1,200,000. Nakig-meeting ang doctor ni Mary Grace. Niingon ang doctor nga dad-on niya si Ritche ang ahente nga maoy nagpaila-ila.

Sa pag-abot nila sulod sa coffee house anang alas dos sa hapon ganiha, gipaila dayon ni Mary Grace si Atty. Becalas ngadtong Dr. Cuenca ug Ritche. Nakalitan ang doctor ug kauban.

"Legally, forfeit na gyud ang down payment sa doctor. Apan nianhi man mo aron pagsabotsabot, di lang una ko motingog. Ang akong pangutana ninyo Mary Grace ug Dr. Cuenca, kun open pa ba mo sa areglo?" ni Atty. Becalas. Niyango si Mary Grace. "Ay na lang nang penalty, Mary Grace" ni Dr. Cuenca. "Adto ta mag-istorya sa laing lamesa nga kita rang duha" ni Mary Grace dayong gunit sa kamot sa doctor. Nibalhin sila’s layolayo nga lamesa.

Dangtag 30 minutos, namalik sa unang lamesa sila si Dr. Cuenca ug Mary Grace.

"Naareglo mo o wa?" ni Atty. Becalas ngadto ni Dr. Cuenca. Wa nitingog ang doctor "Naareglo. Imbis P200,000 ang penalty, P100,000 na lang" si Mary Grace ang nitubag.

"Dr. Cuenca! Ayaw pag-ingon nga "you could not be intimidated by any lawyer!" Insulto man nang imo! Nianhi ko aron pagproteher sa katungod sa akong kliyente. Nahadlok siya kay grabe kaayo inyong hulga sa teks. Wa siya magdahum nga wa moy kuyog abogado. Contract is the law between the parties. If you are not intimidated, why did you offer a settlement?” ni Atty. Becalas. Naisa ang tingog. Nanglab-ok sa laway ang doctor. "That's why I did not become a lawyer because I did not want to become a crook," ni Dr. Cuenca. Namula ang aping.

"Ayaw hukmi tanang abogado. Tungod lang kun may dautan kang kasinatian sa abogado, tanan dautan na. Kun naa kay problema sa birth certificate, lisensiya, ID o bisan unsang dokumento, asa ka man duol?" ni Atty. Becalas. Namula sab. "Kun but-an kang doctor, nagtuo kang way doctor buang? Basig nalimot ka sa canister surgey scandal? There is good and bad in every one, Doctor! Kun wa ka ma-intimidated, ako'y imong i-intimidate?” sa abogado.

"Hala, Mary Grace, ayaw idayon inyong areglo. Idayon ang pag-forfeit sa down payment. Tan-awon nato’g di ba siya moduol og abogado!" ni Atty. Becalas. Naminghoy si Dr. Cuenca. Giinom ni Atty. Becalas og tiwas iyang mineral water. Nitindog. Ug nigawas sa coffee house. (Kataposan) (Ang gusto’g libreng kunsulta puwede moanha sa bupete sa tagsulat sa Sabado. Dalha lang ning pahina sa sugilanon)