GULA 179
“Mao usab kanay akong gikalibgan karon, Dick,” matud ni Carlo. “Sensitibo kaayo’g panimaho ang mga kanahan kay natultolan man gayod nila ang atong gitagoan sa bata.”
“Wala kahay nakapaniid kanato sa atong paghatod sa bata ngadto sa Carmen?” mipagawas ang hepe sa taphaw’ng pangagpas niini.
“Mao kanay dili kita makaseguro,” ni Carlo pa. “Basin tuod kun nabantayan kita sa mga sakop sa kulto sa atong paghatod sa bata ngadto sa Carmen.”
Nahilom si Maj. Campo didto sa pikas tumoy sa linya. “Moanha ko karon sa imong buhatan, Dick,” nagkanayon si Carlo.
“Labing maayo hinuon, Carlo,” sa hepe. “Paaboton ko ikaw.”
Human sa ilang panagsulti, wala tuyoa nga nabuhian ni Carlo ang usa ka taas nga panghupaw. Nagsuhag nga mga pagbati nag-alintabo sa iyang dughan. Nahingawa siya pag-ayo sa nahitabo nila ni Arlin ug Inday Shantal nga nadagit sa salbahis nga mga sakop sa kulto. Wala siya magpalandong nga mahitabo kini. Ug nabalaka siya kun unsaon niya pagpasabot sila si Tiyo Berto mahitungod sa nahitabo nila ni Arlin ug Inday Shantal.
Apan dili mahimong ililong niya ang kamatuoran ngadto kanila. Kinahanglang masayod sila sa matuod nga nahitabo aron dili sila maglaom nga ang inahan ug anak maayo ang kahimtang didto sa Carmen.
Dihang nakabaton na siya’g igong kalig-on sa pagtug-an sa matuod nga nahitabo nila ni Arlin ug Inday Shantal, migawas siya sa lawak ug gipakigsultihan sila si Tiyo Berto. Nakugang ang tulo sa kasayoran nga iyang gibutyag. Si Belen mihilak. Si Jimmy nagpamukpok sa dughan niini. Nagpangumot usab si Tiyo Berto sa ulo. Naguol siya sa nahitabo. Nabalisa pag-ayo.
“Gikasubo ko pag-ayo kining hitaboa, Gaw,” gikabyonan sa kaluya ang tingog ni Carlo. “Gibuhat na namo ang tanan aron mahalikay ang bata sa kakuyaw. Apan napakyas kami. Natultolan gayod sa Tambayawan ang dapit nga nahimutangan sa bata. Ang nakapait pa gyud kay gidala usab nila si Arlin.” -- Sumpayan pa