Anino sa Kulto

Apan mao gayoy pagkaputol sa pagbagting sa nakasulod na siya sa lawak. Nagsiga pa ang keypad ug screen sa cellphone nga gipatong sa ibabaw sa lamesita. Gipunit niya ang cellphone ug may gipislitpislit. Buot niyang sutaon kun kinsa ang nanawag pinaagi sa pagsubay sa numero nga narehistro sa missed calls. Dako ang iyang pagtuo nga importante ang tuyo niini kay sayo man gayod kining nanawag.

Bag-o alang kaniya ang numero nga milutaw sa missed calls. Wala pa kini marehistro sa phonebook sa iyang cellphone. Dili niya sinati ang maong numero.

Giabot og kalibog si Carlo. Nia na usab kining laing misteryo, niya pa sa kaugalingon. Kinsa na man usab kining nanawag sa iyang cellphone nga dili niya pamilyar ang numero? Sakop usab kaha kini sa kulto? Kining maong mga pangutana gisukot ni Carlo sa iyang kaugalingon. Napulos na lang kulto sa iyang hunahuna.

Gibalik ni Carlo pagbutang ang cellphone sa ibabaw sa lamesita. Miduol siya sa nahimutangan sa salamin ug gisud-ong ang iyang kaugalingon. Milutaw ang iyang kaambongan karon nga bag-o siyang nakakaligo ug nakapamalbas. Giayo niya’g huping ang iyang buhok atubangan sa salamin.

Wala pa gani siya makahuman og panudlay, nahaigking siya dihang kalit mibagting ang iyang cellphone. Midali siya pagpaingon sa gipatungan niining lamesita ug gipunit. Daklit nga gitamdan ang numero nga milutaw sa screen sa caller ID. Ang numero nga milutaw sa missed calls kaganina maoy nabasa niya sa screen. Gidali niya pagtubag ang tawag.

Tingog sa lalaki ang iyang nabati gikan sa pikas tumoy. “Si Roding ni,” paila dayon sa nanawag. “Igsoon ni Jimmy.”

“Uy,” tuaw ni Carlo sa nakaila na. “Kaingon ko’g si kinsa. Tuod, nganong nanawag ka man? Kumosta na kamo diha sa Carmen?”

“May nahitabo diri, Mr. Guieb,” laktod nga tug-an ni Roding. “U-unsa?” nakugang si Carlo. Namatikdan niya nga misugod pagkusog ang butokbutok sa iyang dughan. “U-unsang hitaboa?

“Sila si Arlin ug Inday Shantal,” ni Roding pa, “gikuha kagabii sa wala namo hiilhing mga tawo.” -- Sumpayan pa