Hinog sa punoan

Gula 93

“Wala kami daotang gibuhat, Urielle,” ni Patrick pa. “Wala ko magpakasala sa atong kaminyoon sa akong pagpakigkita kaniya.”

“Kapila na kadto ninyo buhata?”

“Mao kadto ang ikaduha. Ug mao na usab kadto ang kataposan namong panagkita.”

“Unsay buot mong ipasabot?”

“Magminyo na si Chariz. May mangasawa kaniya nga usa ka Koreano. Mao kini ang hinungdan nga nakigkita siya kanako. Nananghid siya kanako nga magminyo na siya ngadto sa penpal niyang Koreano.”

“Kinahanglan pa ba gud nga mananghid siya nimo kun magminyo na siya?”

“Kinahanglan, Urielle.”

“Ngano man?”

“Tu-tungod kay may gikasabotan kami.”

“Nga unsa?”

“Nga dili una siya magminyo samtang dili pa maklaro ang atong kaminyoon.”

“W-wa ko ikaw hisabti?”

“Wa ko makaseguro kun motunhay ba gayod ang atong kaminyoon, Urielle. Nasayod ko nga dili ako ang imong gihigugma kundili si Nelson. Busa nagplano ko nga kun dili ka gayod makakat-on sa paghigugma kanako sulod sa usa ka tuig natong panagtipon, ipa-annul nako ang atong kasal.”

“U-unsa?” -- Sumpayan pa