Anino sa kulto

GULA 175

Igo lang miyango si Carlo. Niining tungora, natapos na ang pangadye. Nag-ulhos pagpamauli ang mga nanabat human makapangape.

“Maayo tingali, Dick,” namulong si Carlo pagkilab sa pipila ka daklit,“nga adto kita sa sulod magtiwas og sulti. Aron sab makapangape.”

Si Maj. Campo ug Lt. Valera misanong sa pagdapit ni Carlo. Nanulod sila sa balay.

Sa sala, gitibawas nila ang ilang panagsulti. Pulos bahin sa problema nga ilang giatubang ang ilang gihisgotan. Naputol la’g makadiyot ang ilang panagkabildo dihang miabot si Belen nga naghatod sa tulo ka tasa sa kape ug tinapay. Pagbiya ni Belen, nagpadayon na usab sila’g kabildo samtang nangape. Ang kulto maoy dugokan sa ilang gipanagsultihan.

Milanat gayod og dugay ang ilang panagkabildo. Lapas na sa ikanapulog usa ang takna sa kagabhion sa pagpamauli nila ni Lt. Valera ug Maj. Campo.

Buntag sa adlaw’ng Martes. Sayo nga mibangon si Carlo. Naligo siya. Gusto siya nga presko ang iyang kaugalingon nga moatubang sa iyang mga bulohaton. Ipadayon na niya ang paghimog imbestigasyon bahin sa kamatayon sa iyang mga ginikanan ug ingon man sa iyang iyaan. Nag-anam na karon kadako ang iyang pagtuo nga masulbad niya ang kaso nga iyang gigunitan sa higayon nga malumpag niya ang kulto nga naglihok sa lungsod sa Mabini.

Ang dakong problema niya mao kun unsaon pagsikop ang mga Tambayawan. Wala siya makaila kanila. Mao ray bugtong niyang nasayran nga may patik nga 666 ang mga disipulo sa Tambayawan. Apan lisod silang mailhan tungod kay kanunay silang nagtakoban ug nagtago sa kangitngit.

Paggawas ni Carlo sa banyo, diha na si Belen sa kosina, naghikay sa ilang pamahaw. Igo lang siyang mitimbaya niini. Milahos dayon siya sa lawak nga gipahigdaan kaniya. Samtang nagdangadanga na siya sa pultahan, iyang nabati nga nagbagting ang iyang cellphone. Midali siya pagsulod. -- Sumpayan pa