Ang mga pasahero

Human sa napulo ka tuig nako nga pagkadrayber og dyip de pasaheroan sa siyudad sa Ozamis, gipul-an ko. Nangita kog asenso. Kay ulitawo pa ko ug wa pay seryoso nga karelasyon nga babaye, nanimpalad ko sa Sugbo. Nangaplay ko sa pagkadrayber og taksi. Nakadrayeb kog usa ka unit sa Green Meadow Transport.

Nia, nag-parking ko ning lawom nga gabii tungod sa atubangan sa usa ka dakong hotel daplin sa karsada. Pearl Chain ang ngalan sa hotel ug usa ni ka five-star sumala sa mga brochures nga gipakita nako sa usa ka bell boy usa ka higayon niana. Nia ang hotel natukod sa daplin sa dalan Hernani Cortes, Tipolo, Mandaue. May napulo ka andana ang maong hotel.

Unya may lalaki ug babaye nga sweet kaayo nga nanggawas sa hotel. Nag-agbay ang toong braso sa lalaki ngadto sa abaga sa babaye. Ang walang bukton sa babaye nagbalikos sa walang hawak sa lalaki. Way kalainan sa bana’g-asawa nga bag-o lang nakasal. O sa manag-uyab nga bag-o lang sang nagkasabot.

Maya ilang mga nawong sa kahimoot. Timailhan nga nagkatagay gyud sila sa kalis sa himaya sulod sa usa ka lawak sa maong hotel. Unya akong gitataw ilang mga nawong paghiduol na gyud nila sa akong taksing gimaneho. Kaila ko nila.

Dili unta ko gustong makasakay sila sa akong taksi. Nipaandar ko aron mopadagan. Apan nagunitan na sa lalaki ang door knob sa toong pultahan dapit sa luyo. Di na ko ka eskapo. Giabli sa lalaki ang pultahan. Gipauna niyag sulod ang babaye. Paghiluna sa babaye dapit sa wala, nisakay sab ang lalaki. Nilingkod tupad niya. Unya gisira niya ang pultahan sa taksi.

"Sa pier 6 Dong" matud sa lalaki.

Tua didto ang mga fast craft nga para Ozamis. Pihong mopauli na sila sa Ozamis. Giinggansa ko ang primira ug nipadagan. Nitan-aw ang lalaki sa ID nako nga gibitay tungod sa rear view mirror sa taksi. "RUDY GABUCAN" ang napatik sa akong ID. Ako gyung tinood nga ngalan. Apan sayud ko nga wa sila kaila sa akong ngan. Kay sila mga tawo sa alta sosyidad. Ako nagpuyo lang sa eskwater erya sa Ozamis. Apan makit-an ko sila sa panahon nga mosimba ko. Kay makit-an ko man sila ma-Domingo sa San Sebastian Parish.

Dili gyud sila mahitabong makaila nako. Apan ako, kaila gyud nila. Dulom hinoon sulod sa taksi. Ang numero lang sa meter nga pula ang bulok ang nagsiga.

Matag karon ug unya magkarinyohay sila samtang nagdagan ang taksi. Maggakos. Maghawok. Init gyud kaayo ang pagbati nila sa usa’g usa. Masiklapan man nako sa samin.

Pag-abot sa pantalan, nipatak og otsenta pesos ang metro. Gilugar nako ang taksi pagmandar sa lalaki nga ilugar. Gihatagan kog tibook usa ka gatos sa lalaki.

"Ay na lag suklii, Dong," sa lalaki. Giuli nako ang kuwarta.

"Ay lag plete, Padre" nako pa nga nagtunol og balik sa papel de banko.

"Ha? Giunsa nimo pagkahibawong pari ko?" nakugang ug nahingangha ang pari.

Naniga ang mga mata sa babaye pagkadungog nga may nakaila diay nila dinhi sa Sugbo. Wa pa sila kakanaog sa taksi.

"Taga-Ozamis sab ko Padre. Pero nanginabuhi lang ko dinhi sa Sugbo" dugang nako. Wa dawata ang kuwarta sa pari.

Nikoot og dalidali ang pari sa iyang pitaka og balik. Nikuhag tibook usa ka libo ka pesos.

"Palihog, Dong. Ayaw pagsaba nga nagkita ta" sa pari.

Gihagbong niya ang kuwarta sa bakanteng lingkuranan sa akong tupad. Giabli niyag dali ang kotse. Ug nagdali silang nanaug. Nagputos dayon ang babaye sa iyang nawong og bandana.

"Ay'g kabalaka Padre. Di na ko mouli sa Ozamis. Wa man koy ulion didto. Ilo na kong tuwapos ug nangipon lang kos akong mga ig-agaw didto" nako pa.

Wa na sila naminaw nako. Kay nisirit silag sulod sa opisina nga isyuhanan og tiket sa barko. Ang akong rason nga di unta ko gustong pasakay nila kay maikog kong magpaplete sa pari. Pari god. Alagad sa Diyos. Di unta ko gustong mopasakay og libre. Apan wa damha nga nidako hinoon akong koleksiyon.

Ang babaye nga kuyog sa pari soloist sa choir sa simbahan. Makaingon lang ko nga nindot gyud diay'ng magpari.

Primiro nahibulong ko ug di ko katoo. Kay kusog man kaayo siyang mamalit og Playboy magazine. Karon, nakaingon ko'ng sakto siya. Kay ang pari homot diay kaayo sa tsiks. Nakapahiyom kong naglingolingo nga nipadagan sa taksi balik sa hotel. (Katapusan)