Gula 91
Ang nanuslok karon sa hunahuna ni Urielle mao ang nahitabo tali kanila ni Patrick kagabii. Nakamatngon kaha ang lalaki sa gibuhat niini kaniya? Nasayod kaha kini nga may nahitabo na kanila? O basin nagtuo si Patrick nga si Chariz ang gikadulog niini kagabii? Pagkadako niyang alkanse kun mao kini mahitabo!
“Didto man diay ko makatulog sa imong kuwarto kagabii?” Si Patrick ang unang migisi sa kahilom nga mihabol kanila.
“Oo,” ni Urielle. “Hubog ka kaayong nahiuli kagabii. Gihatod ka dinhi sa imong mga kauban sa trabaho.”
“Sorry, ha,” ni Patrick pa. “Nahasol ka hinuon.”
“Okey lang. Unsa may kapuslanan sa akong pagka-asawa kun di ko ikaw silbihan?”
Nahilom si Patrick.
“Ngano bang naghubog ka man?” Sukit ni Urielle. “May problema ka ba?”
“Oo,” maoy tubag. “Ingon niini man gyud ang kinabuhi. Basta buhi pa ang tawo, di gyud makalikay sa problema.”
“Ako bay imong problema, Patrick?”
“U-unsa? Nga-nganong nakapangutana ka’g ingon niana?”
“Tubaga ang akong pangutana, Patrick. Ako bay nakaingon sa imong problema?”
“Dili, Urielle. Ug dili mahitabong maproblema ko nimo. Malipayon ko sa atong panagtipon-- sa atong kaminyoon.” -- Sumpayan pa