Luya si Pikoy

Gula 1

Naghinam-hinam na kaayo si Rose kun unsay mahitabo kanila ug sa iyang bana nga si Ramil atul sa unang gabii sa ilang kasal.

Dihang nakabiya na ang ilang mga bisita pagka hapon atul sa adlaw sa ilang kasal, miadto siya sa tubod nga duol ra sa ilang balay aron maligo. Gikomedyahan gani siya sa iyang mga silingan.

“Ah, naligo man g’yud daan! Kulba-hinam g’yud ni kaayo unyang gabii Rose,” nagngisi si Carmela nga nangomedya sa iyang barkada nga bag-ong minyo. “Unsay imong gibati karon Rose. Wala ka ba kulbai?” pangutana ni Nang Basing.

Igo lang mipahiyom si Rose. Nasayud na siya og unsay buot ipasabot sa iyang barkada ug silingan. Parehong nagpahiyom nga nagsud-ong kaniya ang ubang didto sa tubod atul sa maong higayon.

Mihulma ang lawas ni Rose dihang nahumod na sa tubig ang gisul-ob niyang duster nga maoy sagad niya isul-ob kun maligo. “Tagbaw g’yud ron si Ramil pag-angkon anang lawasa,” nagpahiyom si Carmela.

Pagbalik ni Rose sa balay sa iyang mga ginikanan nga temporaryong gipuy-an nila ni Ramil, gisugat siya sa iyang bana nga nagpahiyom. “Uy naligo ka diay?”

“Ikaw, kaligo na usab didto sa tubod kay bugnaw kaayo ang tubig,” matud ni Rose. Igo lang mipahiyom si Ramil.

Mitikyop na ang kagabhion. Sayo sila nga nanihapon ug gihatagan sila’g lugar sa mga ginikanan ni Rose. Una nga misulod sa ilang lawak ang ilang mga ginikanan aron mosulod na usab sa ilang lawak ang bag-ong magtiayon.

Sila na lang duha ang diha sa sala. Miparayeg na pagsugod si Rose ngadto sa iyang bana. Sanglit ambongan si Ramil, in-love g’yud kaayo si Rose sa iyang hinigugma.

Usa sa gidayeg pag-ayo ni Rose kang Ramil mao nga dili kini mapahimuslanon sa higayon. Atul sa pipila ka buwan sa ilang relasyon wala gayod kini mosuway nga mohangyo nga angkonon ang iyang pagkababaye.

Nakadayeg si Rose kang Ramil kay lahi kini og batasan kay ni Ronnie nga iyang kanhi hinigugma. Diriyot man gud makuha ang pagkababaye ni Rose dihang atul sa ilang pagpanuroy, buot angkonon niini ang iyang kaputli.

Kadto maoy hinungdan nga gibuwagan ni Rose si Ronnie. Paglabay sa pipila ka buwan, nahimamat ni Rose si Ramil ug inanay’ng nadani sa ulitawo ang iyang dabong pa nga kasing-kasing.

Humot na kaayo si Rose. Gigamit niya ang imported nga pulbos nga kabahin sa mga regalo nga iyang nadawat ug ang pahumot nga gihatag kaniya ni Ronnie kaniadto.

Gituyo ni Rose ang pagsul-ob og nipis kaayo nga sapot aron inighikap sa iyang bana sa iyang lawas diha-diha kini nga mobatyag og kainit. (Sumpayan)