Anino sa kulto

GULA 173

Nakapangusmo si Carlo samtang midali pagpaingon sa gitagoan nila ni Berto, Jimmy ug Belen.

“Gawas na mo diha, Tiyo,” niya pa. “Wa nay peligro.”

“K-kinsa man tong mga tawhana, Dong?” ni Tiyo Berto nga gihuwasan na sa kahadlok.

“Mga sakop gihapon sa kulto, Tiyo,” laktod niyang tubag. “Apan mikakak pagkakita nga mihay-ad na ang usa nila ka kauban. Misibog.”

“Mga salbahis gayod kanang mga tawhana,” mipahungaw sa kalagot si Belen. “Wala sila’y kalainan sa ilang supremo nga demonyo.”

Wala makatingog sila si Berto ug Jimmy. Ingon sila sa nasugsog sa gisulti sa dalaga sanglit nagpasakop man usab sila sa kulto.

“Dili kita magdugay dinhi,” nagkanayon si Carlo. “Tingalig mobalik kadtong mga animal nga magdala nag daghang mga kauban. Mamiya na kita dinhing dapita.”

Ang tulo ingon sa nakaamgo gilayon nga dili pa sila hingpit nga naluwas sa kakuyaw. Wala sila maglangan. Lagsik ang ilang mga lakang nga namaingon sa gawas sa sementeryo. Si Carlo nga nagsunod kanila nagpanlingi sa ilang gigikanan aron pagsuta kun wala bay mga mata nga nagtan-aw kanila.

Sa didto na sila sa gawas sa sam-ang, mitawag si Carlo sa kuwerpo sa kapolisan. Gipahibalo niya si Maj. Campo nga nakapatay na usab siya’g laing mga sakop sa kulto.

Pagkagabii, samtang gipahigayon ang pangadye sa kalag ni Marta, si Carlo nagbantay sa tugkaran sa balay. Nagkalingaw siya’g pasopaso. Mata’g karon ug unya ang iyang mga mata mosuhid sa palibot. Naniid siya. Gihugtan niya pagbantay ang seguridad sa mga tawo nga nanabat sa pangadye. Nanagana siya nga basin kalit lang motungha ang mga sakop sa kulto ug maghimo’g kadaot. Dili na niya tugotan ang mga disipulo sa Tambayawan nga makahimo pa og dugang kadaot.

Kaganina sa wala pa magsugod ang pangadye, hilom niyang gisuhid ang mga tawo nga nag-ulhos pagpangabot pinaagi sa x-ray eyeglasses nga iyang gisul-ob. Gisuta niya kun wala bay mga sakop nga nakasulod. Apan wala siya’y nakitang timailhan nga may mga sakop sa kulto nga nahisagol kanila. -- Sumpayan pa