Ang pintor ug ang modelo

Nakita ni Leonardo ang usa ka tawo nga aghop kaayo ang panagway, buotan ang hitsura ug wala siyay ikasaway sa panglihoklihok niini ug nagtuo siya nga tukma kini sa iyang gipangita.

Iya kining giduol ug nagpaila siya.

"Ako si Leonardo Davinci, usa ka pintor. Nagkinahanglan ko og modelo alang sa akong himoon nga dibuho sa atong Ginoong Hesukristo. Kun mosugot ka, ikaw ang akong himoon nga modelo."

"Unsa may mga kondisyones?" nangutana ang tawo.

"Ari ta sa taberna magsulti, kun magkauyon ta, adto ta sa akong estudyo."

Didto sa ilang panagsabot sa taberna, nagkauyon ang duha, busa nagkuyog ang duha sa estudyo ni Leonardo. Gipalingkod sa pintor ang tawo, ug gisugdan ang pagdibuho. Sukad niadto, kada adlaw atua ang tawo sa estudyo aron molingkod ug ipadayon ni Leonardo ang iyang pagdibuho.

Milabay ang mga adlaw, nahuman ni Leonardo ang pagdibuho. Iyang gibayran ang tawo ug human niini, milakaw kining malipayon tungod sa kadako sa kantidad nga gibayad kaniya sa pintor.

Bisan nakagasto si Leonardo og dako, nalipay usab siya kay iyang nakita nga ang iyang obra, buhi kaayong tan-awon.

"Akong isunod ang pagdibuho sa hitsura ni Hudas Iscariote," matud sa pintor sa iyang kaugalingon.

Milakaw si Leonardo aron pagpangita og modelo. Apan naglisod siya pagpangita sa tukma nga panghitsura sa iyang himuon nga modelo alang kang Hudas Iscariote. Busa, nakahukom siya.

"Akong adtoon ang mga dapit diin ang mga maldito, mga kriminal, mag-istambayan, sama sa mga sugalan inuman."

Sa iyang paglaroylaroy sa siyudad, gibati niya ang kauhaw. Busa misulod siya sa usa ka taberna ug mi-order og imnonon. Samtang giinom niya ang sulod sa iyang baso, iyang nasigpatan ang usa ka tawo nga nag-inusara sa pag-inom didto sa usa ka suok nga parte sa taberna.

"Kini ang hitsura nga akong gipangita," matud ni Leonardo sa kaugalingon. "Isog ug maluibon kaayo ang hitsura nga bangason usab. Tukma gayod kini sa hitsura ni Hudas." Iya dayon kining giduol ug gitanyagan nga himoong modelo.

Gisugdan dayon ni Leonardo ang pagdibuho sa larawan ni Hudas samtang naglingkod ang iyang modelo. Pila ka adlaw ang milabay, nahuman ang dibuho.

"Sama sa hikit-an ta na ka," matud ni Leonardo, "wa lang ko mahinumdom kun diin."

"Hikit-an na ko nimo," mitubag ang tawo, "ako gihapon tong milingkod dinhi aron i-modelo ang larawan ni Kristo."

"Ha! Mao ba? Sa unsang paagi nga nausab ka ug nahimong maisog, maldito ug maluibon ang imong hitsura?"

"Ang dakong kantidad nga imong gibayad nako, maoy nakapahimo nakong ngil-ad ug dautan," tubag sa tawo.

Busa, usa ra ka tawo ang nag-modelo sa larawan sa atong Ginoo ug sa larawan sa maluibon nga si Hudas Iscariote. (Katapusan)