Anino sa kulto

Gula 172

Milihok dayon si Carlo. Gikan sa nitso nga iyang gipasalipdan, mainampingon siyang mikamang ngadto sa unahan. Mihinok siya’g lipot sa panteyon nga gipasalipdan sa tawo nga iyang nakita dili pa lang dugay. Dihang napahimutang na niya ang iyang kaugalingon sa maayong pagkasalipod, miliraw ang iyang mga mata sa palibot. Naniid. Wala siya’y namatikdan nga kasikas.

Ang bato nga ingog kumo kadako nga nasindolan sa iyang tuong tiil gipunit niya sa wala niyang kamot samtang ang tuong kamot maoy naggunit sa Uzi. Mikilas ang iyang panan-aw. Nakita ang sin nga atop sa payag-payag sa usa ka lubong.

Uran-uran, gilabay niya ang bato nga iyang gigunitan ngadto sa atop sa sin. Milugapak ang sin nga naigo sa bato. Dihadiha milanog ang masipang buto sa taas og kalibreng armas gikan sa tawo nga diha ra magpasalipod sa luyo sa nitso nga gihup-an usab ni Carlo. Maoy gipusil niini ang dapit nga gigikanan sa lugapak.

Wala lang ing kasayoran ang kaaway nga si Carlo, ang nagmugna sa maong lugapak, diha ra sa duol. Kalit nga miligid si Carlo sa yuta gawas sa iyang gitagoan. Nabantang na pag-ayo ang tawo sa iyang posisyon nga naghayang. Ang kaaway wala na makapanalipod sa kaugalingon nga sayon ra kaayo niyang giluthang. Ang tawo nga wala nay kinabuhi nagbad-ay sa ibabaw sa panteyon ang katunga sa lawas duol sa iyang tiilan.

Unya nakabati si Carlo og kagahob didto sa unahan. Kadali ra siyang nakabangon ug gisuhid ang dapit nga gigikanan sa kagahob. Maoy nasabak sa iyang panan-aw ang mga anino nga nagdali pagpalayo. Mikabad sila pagpanagan. Gipasundan sila’g mga bala ni Carlo apan wala’y usa kanila nga napugnit. Gukdon unta ni Carlo ang mga kaaway nga buot moikyas apan kalit nausab ang iyang hunahuna. Nabalaka siya nga basin malingla hinuon siya ug walay makapanalipod sa tulo niya ka kauban. Gipasagdan na lang ni Carlo nga makapalayo ang mga kaaway nga mitalaw.

Gibalikan ni Carlo ang iyang napatay. Gitangtang niya ang gisul-ob niining maskara. Wala siya makaila sa maong tawo. Gilahos niya pagwalis ang sinina nga gisul-ob niini. Ug nakapanglingo siya. Maoy nabantang sa iyang panan-aw ang patik nga 666 sa bukobuko sa tawo. Wala gayod siya masayop sa iyang katahap. Sakop sa kulto ang iyang napatay. -- Sumpayan pa