Hinog sa punoan

Gula 88

Ug tingali, lisod sab siyang higugmaon alang kang Patrick kay wala diha kaniya ang mga hiyas sa usa ka babaye nga gipangita niini.

Lawom nang gabii apan wala pa mahiuli si Patrick. Nabalaka na pag-ayo si Urielle. Ang iyang hunahuna nga gigamhan sa pangabubho nagmugna nang negatibong mga pangagpas. Mga katahap nga posibleng walay basehanan.

Tingali nag-uban pa hangtod niining mga orasa sila si Patrick ug Chariz. Labing siguro, malipayon kaayo ang duha. Posibleng atua sila karon sulod sa usa ka pribadong lawak ug nagtagbaw sa ilang kaugalingon sa lawasnong kalipay.

Naputol ang paghanduraw ni Urielle dihang nakadungog siya’g andar sa sakyanan nga mihunong sa tungod sa gate sa ilang balay. Unya milanog ang busina. Midali siya paggawas sa balay aron ablihan ang gate.

Hubog nga nahiuli si Patrick sa ilang pinuy-anan. Nakugang pag-ayo si Urielle kay dili kini ginhapon. Sukad sa ilang panagtipon, karon lang nahitabo nga nahubog si Patrick. Gihatod na gani kini sa duha ka kauban niini sa trabaho tungod kay wala na kini umoy. Dili na makahimo si Patrick sa pagmaneho sa sakyanan niini tungod kay hubog kini kaayo.

Giagak si Patrick sa duha ka kauban niini paingon sa master’s bedroom. Human mapahimutang si Patrick, nagpasalamat si Urielle kanila ug namauli na ang duha. -- Sumpayan pa