Anino sa Kulto

“Karon dayon kontakon nako si Arlin sa cellphone,” matud ni Carlo. “Pahibaloon ko siya sa atong gikasabotan.”

Pagka-Domingo, sumala sa gikasabotan, nangandam ang tanan alang sa paglubong ni Tiya Marta. Daghan ang nanguyog sa paghipos sa minatay. Pasado alas dos sa sayong kahaponon ang paghatod niini ngadto sa Simbahang Katoliko. Gipamisahan una nila ang minatay kang Padre Daniel sa wala pa kini ihatod ngadto sa dayon niining pahulayan agi’g pagtuman sa ritwal nga gitamod sa tinuohang Kristiyano bahin sa paglubong.

Ang pari mibasa og pipila ka teksto sa Bibliya nga gipahaom sa gihimo niining seremonyas. Maoy gibasa sa pari ang mga tudling sa Balaang Kasulatan nga makahatag og diyotay’ng kahumpayan sa dughan sa mga hingtungdan nga nagbangutan sa tumang kasub-anan.

Usa sa mga teksto sa Bibliya nga gibatbat sa pari mao ang Salmo 116:15 nga nag-ingon: Hamili alang sa mga mata sa Ginoo ang kamatayon sa iyang mga balaan. Ang pari mipasabot nga ang gihisgotan sa Bibliya nga mga balaan mao ang katawhan nga pinili sa Dios. Gipatin-aw sa pari nga si Marta takos nang pagailhon nga usa sa mga pinili sa Dios tungod kay nakapangompisal na kini sa mga kasal-anan niini ngadto kaniya. Mibalik na si Marta sa Ginoo sa wala pa kini mamatay busa dako’g paglaom nga atua na kini karon sa sabakan sa Dios nga maoy bugtong tag-iya sa tanang kinabuhi.

Apan samtang nagpahigayon ang pari sa hamubo niining seremonyas, si Carlo wala mahimutang. Nagpalayo siya sa mga tawo. Gisul-ob niya ang iyang x-ray eyeglasses. Ang Uzi gisulod sa knapsack nga iyang gikalibhay. Hilom siyang naniid kun wala bay mga sakop sa kulto nga nahikuyog sa paglubong sa iyang iyaan. Ginamit ang x-ray eyeglasses nga molagbas sa sapot sa tawo, iyang gitagsatagsa pagsuhid ang mga bukobuko sa mga tawo nga mikuyog sa paglubong sa iyang iyaan.

Apan wala siya’y namatikdan nga may nahasagol kanila nga kaabin sa mga Anti-Kristo. Wala siya makakitag tawo nga may patik nga 666. -- Sumpayan pa